Անհրաժեշտ է բանակցային օրակարգ ներմուծել և հիմնավորել իրավական, պատմական, քաղաքական փաստարկները. ԱՀ պատգամավորը Արցախի փրկության մասին

Այսօր յուրաքանչյուրը Արցախը փրկելու, այն հայկական պահելու ծրագրեր է ներկայացնում։ Որն՞ է արցախցիների` Արցախը փրկելու հստակ դիրորոշումը այս եւ այլ հարցերի շուրջ զրուցել ենք ԱՀ ԱԺ պատգամավոր ՍԵՎԱԿ ԱՂԱՋԱՆՅԱՆԻՑ:

-Պարոն Աղաջանյան, որն՞ է Ձեր, որպես Արցախցի, ապա նաև պատգամավոր Արցախի փրկության Արցախի հստակ դիրքորոշումը:

 -Այո՛, ճիշտ եք, այսօր բազմաթիվ ծրագրեր են ներկայացվում Արցախը փրկելու և հայկական պահելու համար, իսկ յուրաքանչուրը՝ շեշտելով, եթե նկատի ունեք քաղաքական ուժերին, ապա պետք է բոլոր ներկայացված ծրագրերը համադրել, քննարկել և արդյունքում ստանալ հստակ ճանապարհային քարտեզ ու առաջնորդվել դրանով, իսկ դրան հասնելու համար անհրաժեշտ է բոլոր քաղաքական ուժերի կոնսոլիդացիա՝ գոնե այդ նպատակով:

Ինչ վերաբերում է իմ դիրքորոշմանը, ապա կասեմ հետևյալը՝ որպես Արցախցի՝ ապրել Արցախում և պայքարել այն պաշտպանելու համար, իսկ որպես պատգամավոր՝ 1-ին հերթին ունենալ հզոր բանակ,  իսկ 2-րդ հերթին վարել ճիշտ արտաքին քաղաքականություն, այսինքն Ադրբեջանի հանրապետության կողմից պարտադրված Հայաստանի հանրապետության և Արցախի հանրապետության նոր դրությամբ, բանակցային կետի զրոյացմամբ, իրավիճակը մեզ համար նոր հնարավորություններ է բացել: Ըստ այդմ անհրաժեշտ է բանակցային օրակարգ ներմուծել և հիմնավորել իրավական, պատմական, քաղաքական փաստարկներ, որոնք ինչ-ինչ պատճառներով անտեսվել և ամբողջությամբ չեն օգտագործվել հայկական դիվանագիտության կողմից:

-Պարոն Աղաջանյան, թշնամին ակտիվ աշխատանքներ է իրականացնում Աղավնոյի շրջակայքում, ինչը, բնականաբար, ունի հեռահար նպատակներ։ Ի՞նչ վտանգներ եք տեսնում այստեղ և ինչպես է Արցախը դիմագրավում օրեցօր մեծացող Ալիևի ախորժակներին:

-Եթե նկատի ունեք ճանապարհաշինության աշխատանքներին, ապա ցավոք սրտի դա բխում է 2020 թ. նոյեմբերի 9-ի եռակողմ հայտարարությունից (6-րդ կետ), որտեղ նշվում է, որ ԼՂՀ և ՀՀ-ի միջև կապն ապահովելու համար առաջիկա 3 տարիների ընթացքում պիտի հաստատվի Լաչինի միջանցքի երկայնքով նոր երթուղու կառուցման նախագիծ, որից հետո ռուսական խաղաղապահ զորակազմը կվերատեղակայվի՝ այդ երթուղին պաշտպանելու համար: Ինչ վերաբերում է վտանգներին, ապա այն սպասելի է ոչ միայն Լաչինի միջանցքով, այլ սահմանի ողջ երկայնքով, որին դիմակայելու համար արդեն նշել եմ առաջին հարցի պատասխանում:

-Ակնհայտ է, որ այսօր փաստացի Արցախի անվտանգության թիվ մեկ երաշխավորը ՌԴ-ն է, ինչպե՞ս եք տեսնում պայմանագրով նախատեսված ժամկետների լրանալուց հետո Արցախի անվտանգությունը, երբ ՌԴ խաղապահները դուրս գան:

-Այո՝, համաձայն եռակողմ հայտարարության՝ ՌԴ-ի զինված ուժերն են փաստացի հանդիսանում թիվ 1 անվտանգության երաշխավորը, բայց մենք համոզված ենք, որ Հայաստանի հանրապետությունը իր ամբողջ քաղաքական, տնտեսական և արդյունաբերական հնարավորություններով կանգնած է ու համոզված եմ կանգնած է լինելու Արցախի հանրապետության թիկունքում՝ հանդիսանալով ԱՀ ժողովրդի անվտանգության երաշխավորը:

Ինչ վերաբերում է ՌԴ խաղաղապահների դուրս գալուց հետո ԱՀ անվտանգությանը, ապա Արցախի պաշտպանությունը և անվտանգությունը տեսնում եմ միայն ու միայն հզոր, պատրաստված բանակ ունենալով: Այլ կերպ չեմ պատկերացնում:

ԻԼՈՆԱ ԱԶԱՐՅԱՆ