Սին, խուճապ առաջացնող տեղեկություններով՝ չձեւանալ «հայրենասիրության էտալոն»․ ԱՀ պատգամավորի խորհուրդը ԱԺԲ-ին

Քիչ առաջ Ազգային-ժողովրդավարական Բևեռի մամուլի ծառայությունը տարածել է խուճապ առաջացնող սին  հայտարություն, որում մասնավորապես ասվում է․

«Տեղեկություններ կան, որ օրերս Ստեփանակերտից բարձրաստիճան պաշտոնյա է այցելել Արցախի Քաշաթաղի շրջանի Աղավնո համայնք և համոզել Աղավնոյի բնակիչներին, որ ընտանիքներով հեռանան գյուղից: Վերոնշյալ պաշտոնյան հայտարարել է նաև, որ «այսպես, թե այնպես գյուղը դատարկվելու է, քանի որ Ադրբեջանը շուտով կշահագործի Աղավնոյին կից ճանապարհը»:

Վերոնշյալը ԱՀ ԱԺ «Արդարություն» խմբակցության  պատգամավոր Կարեն Հովհաննիսյանը «Իրավունքի» հետ զրույցում որակեց բացարձակ ապատեղեկատվություն, որն ունի հստակ նպատակ՝ խուճապ առաջացնել Արցախի Աղավնո համայնքի եւ հարակից բնակիչների շրջանում։ Մասնավորապես պատգամավորը փաստում է․

-Իսկապես տեղի է ունեցել Արցախի բարձաստիճան պաշտոնյանների այցելություն Աղավնո համայնք, ընդ որում այդպիսի այցելությունները կրում են պարբերական բնույթ, ինչը պայմանավորված է Ադրբեջանի կողմից կառուցվող նոր ճանապարհի խնդիրներով։  Մասնավորապես,  այցելությունները կապված են ազգաբնակչության անվտանգության պահպանման հարցերի եւ Աղավնո գյուղի պահպանման հետ։

Վստահեցնում եմ, որ վերը նշված քննարկման ժամանակ հարց է բարձրացվել այն մասին, թե ինչպես եւ ինչ եղանակներով ենք կարողանալու պահել գյուղը, որպեսզի շրջանցենք հնարավոր շրջափակման վտանգը։

Պատգամավորը նկատում է նաեւ․

-ԱԺԲ ակտիվիստներին խորհուրդ եմ տալիս քիչ խոսել եւ քիչ լարվածություն առաջացնել ռուս խաղաղապահների գործունեության հետ կապված ազգաբնակչության մոտ։ Իսկ հնարավորությունների դեպքում առաջարկել այլ՝ ավելի օպտիմալ լուծման եղանակներ, իրենց չձեւացնելով հայրենասիրության էտալոն։

Ամփոփելով խոսքը մեր զրուցակիցը արձանագրում է․

-Ինքս քաշաթաղցի եմ, եւ ինձ համար Քաշաթաղի յուրաքանչյուր քար, այն ինչ մնացել է չարաբաստիկ նոյեմբերի 9-ի համաձայնագրից հետո,  կյանքի չափ թանկ է։

ԻԼՈՆԱ ԱԶԱՐՅԱՆ