Գնացել էի հաղթանակի եւ Հայաստանի դրոշը ծածանելու հստակ նպատակով. Արցախցի մարզիկը պրոֆեսիոնալ մենամարտերի միջազգային մրցաշարի հաղթող

Ստեփանակերտի Ստեփան Շահումյանի անվան օղակաձև պուրակում դիմավորել  են  Վրաստանի մայրաքաղաք Թբիլիսիում GFC-16  միջազգային պրոֆեսիոնալ մենամարտերի կազմակերպության կողմից կազմակերպված մրցաշարի հաղթող, Հայաստանը ներկայացնող արցախցի մարզիկ Թաթուլ  Ավագյանին և մարզիչ Գարեգին Աղաբալյանին:

Խառը մենամարտի նրբությունների, հաջողության գրավականի, հայկական դրոշը ծածանելու զգացողության եւ այլ ուշագրավ հարցերի շուրջ զրուցել ենք Հայաստանի դրոշը Վրաստանում ծածանած արցախցի մարզիկ ԹԱԹՈՒԼ ԱՎԱԳՅԱՆԻ հետ:

-Թաթուլ, կպատմե՞ս, թե ինչ մրցում էր եւ ինչպես կարողացար հաղթանակ գրանցել:

-Նախ ասեմ, որ խառը մենամարտեր սպորտաձեւով զբաղվում եմ արդեն յոթ տարի: Մենամարտին մասնակցում էին աշխարհի ութ պետություններ: Մրցակիցս Վրաստանի ներակայացուցիչն էր: Առաջին ռաունդում ունեցա բացթողումներ, որովհետև մրցակիցս լավ էր պատրաստվել: Երկրորդ ռաունդում արդեն կարողացա ուղղել սխալներս: Մարզչական կազմի հետ միասին կարողացանք գործել այլ մարտավարությամբ և հասնել ցանկալի արդյունքի: Հայաստանից ներկայացված էինք երեք հոգով, երկուսիս հաջողվեց հաղթանակ գրանցել: Հատկանշականն այն էր, որ ի սկզբանե ինձ էին որպես ֆավորիտ տեսնում եւ, փաստորեն ո՛չ ինձ, ո՛չ ինձ հավատացողներին հուսախաբ չարեցի:

Ուզում եմ հատուկ ընդգծել, որ իմ հաղթանակի գրավականը իմ ընկեր, իմ մարզիչ, պրոֆեսիոնալ մարզիկ Գարեգին Աղաբալյանն Է, առանց որի ես չէի հասնի այն ամենին ինչին հասել եմ այս սպորտաձեւում:

-Թաթուլ, կայի՞ն մասնակիցներ Ադրբեջանից, Թուրքիայից:

-Այո, մասնակցում էին ինչպես Ադրբեջանից, այնպես էլ Թուրքիայից: Բայց նրանց հետ որեւէ շփում չեմ ունեցել բնականաբար: Հաղթանակից հետո նկատելի էր նրանց եւ առհասարակ մասնակիցների վերաբերմունքը իմ հանդեպ, ինչը բնական էր ինձ համար:

Ես գնացել էի հաղթանակի հետեւից, անգամ մտքիս ծայրով չի անցել պարտվելու միտքը:

-Թաթուլ, կպատմե՞ս խառը մարտեր սպորտաձեւի մասին:

-Խառը մենամարտերը (MMA) աշխարհում շատ տարածված, ամեն օր զարգացող սպորտաձեւ է, կա եւ սիրողական եւ պրոֆեսիոնալ: Ես սիրողականից կամաց-կամաց անցում կատարեցի պրոֆեսիոնալի եւ սա արդեն իմ չորրորդ պրոֆեսիոնալ մենամարտերի հաղթանակն է: Հաղթանակս նվիրել եմ Հայաստան խարհին, որի անքակտելի մասնիկն է նաեւ Արցախ աշխարհը: Որտեղ ես ծնվել ու ապրում եմ:

Լուսանկարները մեզ է տրամադրել հաղթանակած մարզիկը:

Վերջին լուսանկարում Թաթուլն է իր մարզիչի` մարզիչ Գարեգին Աղաբալյանի հետ: 

Զրույցը` ԻԼՈՆԱ ԱԶԱՐՅԱՆԻ