Շաբաթը 3 օր` 4 անգամ, մեր տարածքը հատում ադրբեջանական շարասյունը, բայց ես ի՞նչ սրտով գնամ, ո՞նց քրիտիքնով քարը քարին դրված պատերս թողեմ գնամ. Բերձորն այսօր

Հունիսի 27-ին տեղի ունեցած առցանց ասուլիսին Հայաստանի վարչապետ Նիկոլ Փաշինյանը հայտարարել էր, որ Բերձորը շրջանցող նոր ճանապարհի շահագործումից հետո ԼՂԻՄ սահմանից դուրս գտնվող տարածքները անցնելու են Ադրբեջանին։  Ըստ էության, հաստատելով, որ Ադրբեջանին են անցնելու Բերձորը, Աղավնոն և Սուսը։

Ներկայում Բերձոր քաղաքում ապրում է մոտ 150 բնակիչ։ Բերձորում շուրջ 28 տարի բնակություն հաստատած տիկին Աիդան վստահեցնում է` բերձորցիները ամուր կառչած են իրենց հողին.

-Ինքս 28 տարի ապրել ու արարել եմ Բերձորում, ընտանիքս, տղաներս բոլորը այստեղ են, բերձորցիների գոնե հիսուն տոկոսը ինձ ճանաչում է: Պատերազմից հետո ով գնացել, գնացել է, մնացողները դուրս չեն գալու, որ դուրս գալուն մնար, նոյեմբերի 30-ին պիտի դուրս գայինք, էդ ժամանակ ավելի խուճապային էր տրամադրությունները: Փառք Աստծո մնացել ենք, գոյատեւել ենք, ու հիմա դուրս եկողը չենք: Մեր ցանկությունը մեծ է Բերձորում մնալու, լքելու ոչ մի տրամադրություններ չունենք:

-Ասում են, որ պարբերաբար ադրբեջանական շարասյուններ են անցնում, ինչ-որ սադրանքների դիմո՞ւմ են այդ ժամանակ:

-Ես Ձեզ ասեմ, ոչ թե պարբերաբար, այլ շաբաթը երեք օր` չորս անգամ մեր տարածքը հատում ադրբեջանական շարասյունը,  բայց բացառապես ռուսների ուղեկցությամբ, առանց ռուս խաղաղապահների ադրբեջանցիներ չեն անցնում: Ադրբեջանցիները բացարձականապես մեքենաններից չեն իջնում, քաղաք չեն մտնում, շփում մեր քաղաքացիների ու իրենց միջեւ շփում չկա: Բնական է, հնարավոր է, մեկ-մեկ էլ ինչ-որ բառեր նետեն, մեկը ժպտա, մյուսը ծուռ նայի, բայց սադրանք, որպես այդպիսին ռուս խաղաղապահները թույլ չեն տալիս: 

-Տիկին Աիդա, որքան էլ դժվար լինի Ձեզ համար, սակայն կարծես Բերձորը լքելուն այլընտրանք չկա:

-Գիտեք, հիմա մեզ հետ ուզում են անեն նույն բանը, ինչ 1915թվականին արեցին: Էն ժամանակ էլ ինչ-որ թղթի վրա ստորագրության պատճառով հայը բռնեց գաղթի ճանապարհը, անունը դնելով տեղահանություն: Հիմա նույնը մեզ հետ են անում նոյեմբերի 9-ի համաձայնագրով:  Ասում են կամաց-կամաց վեշերդ հավաքեք, որ տեղափոխվեք, բայց ո՞ւր տեղափոխվեմ, ինչի՞ տեղափոխվեմ, 28 տարվա իմ ստեղծածը ոնց տեղափոխեմ, ո՞ւր տեղափոխեմ: Ես ինչ սրտով թողեմ իմ 28 տարիների ընթացքում ստեղծած երեք տունը ու բռնեմ գաղթի ճանապարհը, աշխատել եմ, խանութներ եմ ստեղծել, հիմա ես ո՞ւր գնամ, ի՞նչ սրտով գնամ, ո՞նց քրիտիքնով քարը քարին դրված պատերս թողեմ գնամ: 

ԻԼՈՆԱ ԱԶԱՐՅԱՆ