Զախարյանն այդ կերպ փորձում է փրկել մարզական կարիերան. Բերեզովսկի

Հայաստանի հավաքականի լեգենդար դարպասապ, հավաքականի դարպասապահների մարզիչ Ռոման Բերեզովսկին անդրադառնալով  Արսեն Զախարյանի՝ Լոնդոնի «Չելսի» հնարավոր տեղափոխության թեմային նշել է.

«Որքան էլ միշտ ասեն թե սպորտը քաղաքականությունից դուրս է, գործի մեջ ամեն ինչ այլ է ու մենք առնչվել ենք մարզիկների հանդեպ վերաբերմունքի աննախադեպ իրավիճակների: Չեմ քննադատի, ոչ էլ հարցեր ունեմ Արսենին, դա նրա ընտրությունն է, որը մենք պետք է հարգենք: Հավանաբար, այս կերպ Արսենը ցանկանում է փրկել իր մարզական կարիերան, որն առանց այդ էլ վատ չէր զարգանում այս փուլում:

Թող նա գնա ու մեզ ուրախացնի ուժեղ լիգայում, կհետևենք նրան ու կուրախանանք նրա հաջողություններով»,- ասել է Բերեզովսկին «Матч ТВ»-ի՝ «Есть тема!» հաղորդման շրջանակում:

Խոսելով Զախարյանի Հայաստանի հավաքականը չընտրելու, հայ երկրպագուների եւ մարզիչների վերաբերմունքի մասին, ինչպես նաեւ ֆուտբոլիստի քաղաքացիությունը փոխելու հնարավորության թեմային Բերեզովսկին ասել է.

«Նա հայկական արմատներ ունի, բայց բոլորովին վերջերս ընտրություն է կատարել Ռուսաստանի հավաքականի օգտին ու պետք է հարգել այդ որոշումը։ Հայ երկրպագուներն ու մարզիչներն ուրախ կլինեին ողջունել Արսենին թիմում: Նրա նման ուժեղ ֆուտբոլիստը մեծ օգնություն կլիներ մեր հավաքականի համար։ Ինչ վերաբերում է քաղաքացիության թեմային, երեւի թե դա անհնար է, բայց ավելի հստակ կարող է ասել ՈւԵՖԱ-ն»,- ավելացրել է Բերեզովսկին: