Տեղի կունենա «Իմ ձեռագործ Հայաստանը թանգարաններում» խորագրով փառատոն

«Արհեստագործների միություն» մշակութային հիմնադրամը սեպտեմբերի 17 եւ 18-ին հրավիրում է բոլորին մասնակցելու «Իմ ձեռագործ Հայաստանը թանգարաններում» խորագրով փառատոն-միջոցառմանը, որը տեղի կունենա «Գաֆէսճեան» քանդակների պարտեզում:

Ծրագիրն ուղղված է Հայաստանի թանգարանների հանրահռչակմանը եւ գրավչությանը մշակույթի բնագավառում՝ մատնանշելով հուշանվերի կարեւորության դերը թանգարանի կյանքում: Հուշանվերները պատրաստել են եւ սիրով կներկայացնեն Հայաստանի 7 մարզերի՝ Սյունիքի, Վայոց ձորի, Լոռիի, Տավուշի, Շիրակի, Արագածոտնի, Գեղարքունիքի, ինչպես նաեւ Արցախի եւ Երեւանի շուրջ 50 արհեստագործ վարպետները: Փառատոնի մասնակից տեղացիներն ու մայրաքաղաքի հյուրերը հնարավորություն կունենան ոչ միայն ձեռք բերել արհեստագործների ձեռագործ աշխատանքները, այլեւ տեղում մասնակցել վարպետաց դասերի եւ զարգացնել իրենց արհեստագործական հմտությունները, ապա վայելել տարազների ցուցադրություն՝ կենդանի երաժշտության ներքո:

Առաջին օրը՝  սեպտեմբերի 17-ին, ժամը՝ 09-20:00-ին, տեղի կունենա ցուցադրություն եւ վաճառք, իսկ ժամը՝ ժամը 17:30.00-18:30-ին տարազների ցուցադրություն, իսկ երկրորդ օրը սեպտեմբերի 18-ին, ժամը՝ 09:00-18:00-ին, կլինի ցուցադրություն եւ վաճառք:

«Իմ ձեռագործ Հայաստանը թանգարաններում» ծրագիրն իրականացվում է ՀՀ ԿԳՄՍ նախարարության աջակցությամբ եւ «Արհեստագործների միություն» մշակութային հիմնադրամի նախաձեռնությամբ: «Արհեստագործների միություն» մշակութային հիմնադրամը ստեղծվել է «Տերյան մշակութային կենտրոն» ՀԿ-ի եւ Սմիթսոնյան ինստիտուտի հայաստանյան մասնաճյուղի աշխատակազմերի համագործակցությամբ: «Իմ ձեռագործ Հայաստանը թանգարաններում» փառատոնին աջակցել է «Գաֆէսճեան» արվեստի կենտրոնը՝ տրամադրելով իր »Գաֆէսճեան» քանդակների պարտեզի տարածքը։

Հիշեցնենք, որ նախորդ 4 տարիներին «Իմ ձեռագործ Հայաստանը» փառատոնն իրականացվել է «Տերյան մշակութային կենտրոն» ՀԿ-ի հետ համագործակցությամբ՝ «Իմ Հայաստան» ծրագրի շրջանակում, որը ֆինանսավորվում էր ԱՄՆ ՄԶԳ-ն եւ իրականացվում էր Սմիթսոնյան ինստիտուտի կողմից։

Այս թեմայով Այն, ինչ տեղի է ունենում Արցախի տարածքում, մեր ժամանակների ամենամասշտաբային մշակութային ցեղասպանություններից մեկն է Հայտնի է՝ ով կներկայացնի այս տարի Հայաստանը մանկական Եվրատեսիլում Այսօր Հայաստանը նշում է Անկախության օրը 2023 թվականի սեպտեմբերի 19–20-ը ավարտվեց ոչ միայն պատերազմը, այլ նաև Արցախի հայկական պետականության մի ամբողջ պատմաշրջան Ղարաբաղյան պատերազմի վետերանների միությունը հայտարարությամբ է հանդես եկել