Հունահռոմեական ոճի ըմբիշներից ևս երկուսը սկսում են պայքարն ԱԱ-ում

Հունահռոմեական ոճի Հայաստանի ըմբշամարտի հավաքականի անդամներից ևս երկուսը կսկսեն պայքարն աշխարհի առաջնությունում:

Սեպտեմբերի 12-ին Բելգրադում մրցագորգ դուրս կգան 60 եւ 130 կգ քաշային կարգերի ներկայացուցիչները: Այս քաշային կարգերում Հայաստանի ներկայացուցիչներ Գեւորգ Ղարիբյանն ու Դավիթ Օվասապյանը կմեկնարկեն 1/16 եզրափակիչներից:

Գեւորգ Ղարիբյանի մրցակիցը կլինի երիտասարդների Եվրոպայի կրկնակի չեմպիոն, մինչեւ 23 տարեկանների աշխարհի բրոնզե մեդալակիր, վրացի Պրիդոն Աբուլաձեն, Դավիթ Օվասապյանը կգոտեմարտի երիտասարդների աշխարհի փոխչեմպիոն, ԱՄՆ ներկայացուցիչ Քոլթոն Մայքլ Շուլցի հետ: 

Գեւորգ Ղարիբյանը 2020 թվականի Եվրոպայի չեմպիոն է,  2022 թվականի Եվրոպայի առաջնության բրոնզե մեդալակիր է:

Դավիթ Օվասապյանը մինչեւ 23 տարեկանների աշխարհի եւ Եվրոպայի փոխչեմպիոն է:

Հայաստանի վերջին երկու ներկայացուցիչների նախնական գոտեմարտերը կմեկնարկեն Երեւանի ժամանակով 12:30-ից:

Նախօրեին Հայաստանի հավաքականի անդամ 77 կգ քաշային Մալխաս Ամոյանը դարձավ աշխարհի առաջնության բրոնզե մեդալակիր: Բելգրադում ընթացող ըմբշամարտի աշխարհի առաջնության 77 կգ քաշային կարգի բրոնզե մեդալի համար գոտեմարտում Մալխաս Ամոյանը մրցեց աշխարհի առաջնության արծաթե մեդալակիր  սերբ Վիկտոր Նեմեշի հետ: Ամոյանն առավելության հասավ 7:1 հաշվով և դարձավ աշխարհի առաջնության բրոնզե մեդալակիր իր համար նոր քաշային կարգում: