Մենք  չենք կարող մեր ձեռքերը վեր բարձրացնել եւ հանձնվել. Բեդրոս Կիրկորով

«Իրավունքը» բացառիկ հարցազրույց է ունեցել ՌԴ վաստակավոր արտիստ ԲԵԴՐՈՍ ԿԻՐԿՈՐՈՎԻ հետ:

— Բեդրոս Ֆիլիպովիչ, սեպտեմբերի 12-ի լույս 13-ի գիշերը ադրբեջանական զինուժը հարձակման է անցել ՀՀ պետական ​​սահմանի երկայնքով՝ մարտական ​​գործողություններ իրականացնելով Սյունիքի, Վայոց ձորի եւ Գեղարքունիքի մարզերի ուղղություններով: Ինչպիսի՞ն է Ձեր կարծիքը՝ ստեղծված իրավիճակի վերաբերյալ:

— Նրանք են սկսել, թե` մենք, ես դեմ եմ ցանկացած պատերազմի: Իրենք են սկսել, թե մենք, դա նշանակություն չունի: Չնայած, իհարկե, ինչ-որ տեղ նշանակություն ունի` եթե իրենք են սկսել, ինչո՞ւ են սկսել պատերազմը, եթե կա ստորագրված փաստաթուղթ՝ պատերազմի համերաշխության, գերիների վերադարձի: Ես չգիտեմ՝ նրանք մեր բոլոր գերիներին են վերադարձրել, թե` ոչ: Ես դեմ եմ ցանկացած բռնության: Իսկ այն, որ այս կրակը կրկին վառվում է, դա ԱՄՆ-ի եւ Եվրոպայի ազդեցության հետեւանքն է: Օրերս Մոսկվայում գտնվող Հայաստանի դեսպանատան մշակույթի կենտրոնում էի, հանդիպեցինք Հայաստանի դեսպանատան մշակույթի կենտրոնի տնօրենի հետ: Մինչ այդ, ինչքան եղել եմ Հայաստանի դեսպանատանը, այնտեղ չէի եղել, քանի որ չգիտեի մեր մշակույթի կենտրոնի գոյության մասին: Ես այնտեղ շատ բաներ տեսա եւ համոզվեցի, որ նման ժողովրդին չի կարելի ոչնչացնել, եւ դա երբեք չի լինի: Հայերը միշտ եղել են եւ կմնան հավատարիմ Ռուսաստանին: Բայց պետք չէ ենթարկվել մեր դաշնակներին, որոնք Լոս Անջելեսում հայերի մեջ խռովություն են մտցնում: Դա ճիշտ չէ: Հայը հայի դեմ երբեք չպետք է դուրս գա, այլ լինելով քրիստոնյաներ՝ պետք է կոչ անեն մարդկային հարաբերությունների կարգավորման:

— Ըստ Ձեզ, ի՞նչ ճանապարհով է պետք դադարեցնել պատերազմը, որո՞նք են լուծումները:

— Հայ-թուրքական եւ հայ-ադրբեջանական հարաբերությունները պետք է դիվանագիտորեն լուծել: Ինչպես ասում են` քաղցր լեզուն օձին էլ բնից կհանի: Դա նշանակում է` քաղցր լեզվով, դիվանագիտորեն պետք է լուծումներ գտնեն:

— Իսկ երբ անմեղ ժողովրդի վրա հարձակվում են հանկարծակի՞…

— Գիտեք ինչ, մենք չենք կարող մեր ձեռքերը վեր բարձրացնել, հանձնվել եւ զիջել տարածքներ: Այս մեր վերջին պատերազմում մերոք շատ տարածքներ զիջեցին, որտեղ մեր եկեղեցիներն են, մեր խաչքարերն են, եւ մեր հայերն են դարերով ապրել այնտեղ: Ցավալի է տեսնել, երբ հեռուստացույցով ցույց են տալիս, թե ինչպես նրանցից մեկը նստելով մեր խաչքարին՝ ասում է՝ վերջապես մեր օրինական հողերում ենք: Ի՞նչ օրինական հողերի մասին է խոսքը, եթե դու նստած ես մեր խաչքարին: Գոնե ասելուց առաջ իջիր խաչքարից...

— Եվ վերջում, եկեք հարցազրույցն ավարտենք Ձեր խոսքով` ուղղված հայերին:

— Հայերը պետք է միասնական լինեն եւ չպառակտվեն: Էլի եմ ասում՝ հայը հայի դեմ չպետք է դուրս գա:

ՆՈՒՆԵ ԶԱՔԱՐՅԱՆ

Այս թեմայով Երբ կարող է տեղի ունենալ ԱՄՆ-ի հաջորդ խոշոր հարձակումը Իրանի վրա Վիրավոր իմ Հայաստան, դու դեռ ուղղելու ես քո ողնաշարը Պատմությունը հզոր ուսուցիչ է, բայց դասեր քաղել դրանից մենք այդպես էլ չսովորեցինք Ոտնակոխ անելով Փաշինյանի այս հայտարարությունները` թփռոշացած ՔՊ-իստները գործող քաղաքապետ են «խաղացնում».ուր է հակակոռուպցիոնը Թող մեր եռագույնը միշտ հպարտ ծածանվի ազատ և խաղաղ երկնքի տակ