«Հրապարակ». ՔՊ-ին աջակցելու համար ուսուցչուհին հեռախոս է նվեր ստացե՞լ

«Հրապարակ» թերթը գրում է. «Սիսիանում ՔՊ-ի թեկնածուին իր ձայնով համայնքապետ դարձրած պատմության ուսուցչուհի Նախշուն Յազուլյանն Արման Բաբաջանյանի «Հանուն հանրապետության» կուսակցության ցուցակով առաջադրված ավագանիներից է։ Նա հոկտեմբերի 12-ին «դավաճանեց» կուսակցությանն ու ընտրեց ՔՊ թեկնածու Արմեն Հակոբջանյանին։ Այդ նիստից անմիջապես հետո կինը նոր հեռախոս է գնել իր համար։ Հետո դպրոցում ըմբոստ աշակերտներն ուսուցչուհուց հետաքրքրվել են՝ ՔՊ-ին աջակցության դիմա՞ց եք հեռախոսը նվեր ստացել։ Յազուլյանը մեզ հետ զրույցում չհերքեց, որ նիստի օրն է հեռախոս գնել, սակայն ասաց, թե հեռախոսն ապառիկով է վերցրել՝ բանկերից մեկով։

«Իմ հեռախոսն էդ օրերին փոքր երեխան գցել-կոտրել էր, ու դա համապատասխանել է այդ օրերին։ Եթե ուզում եք, ես իմ վարկային պայմանագիրը կուղարկեմ, որ ընդամենը 72 հազար դրամանոց հեռախոս եմ գնել»,- վրդովվեց նա։ Ինչ վերաբերում է քվեարկությանը․ «Ես մտածել եմ իմ համայնքի մասին, մանավանդ՝ ստեղծված այս իրավիճակին, երբ չգիտես՝ ինչ կարող է տեղի ունենալ։ Դուք պատկերացնո՞ւմ եք՝ էլի նոր ընտրություն, երբ կառավարությունը շատ ավելի այլ խնդիրներ ունի լուծելու՝ զենքի, զինվորների կարիքների եւ այլն։ Ես միանձնյա եմ որոշում կայացրել՝ ելնելով իմ սկզբունքներից եւ իրավիճակից։ Ես չցանկացա, որ գան ուժեր, որոնք ինձ համար ընդունելի չեն»։

Առավել մանրամասն՝ թերթի այսօրվա համարում