Առաջնախաղ՝ Գեղագիտության ազգային կենտրոնում

Oriente Occidente փառատոնի հրավերով ԳԱԿ տնօրեն և Փոքր թատրոնի գեղարվեստական ղեկավար Վահան Բադալյանը սեպտեմբեր ամսին վարպետության դասեր  է անցկացրել Իտալիայի Ռովերետո քաղաքում։ «Իմ կյանքի գույները» խորագրով աշխատարաններին մասնակցել են ոչ միայն հաշմանդամություն ունեցող և չունեցող արտիստներ, այլև տեղի բնակիչները։ Երկշաբաթյա աշխատարանը եզրափակվել է ամփոփիչ ցուցադրությամբ։ 

«Իմ կյանքի գույները» նախագիծը շարունակվում է Երևանում՝ ԳԱԿ կատարողական արվեստների ներառական ուսումնական կենտրոնում։ Արդեն մեկ տարի կենտրոնը ժամանակակից պարի դասընթացներ է առաջարկում հաշմանդամություն ունեցող և չունեցող մարդկանց՝ անկախ տարիքից և փորձառությունից։ Բացումից մինչ օրս այստեղ մասնագիտական կրթություն են ստացել ավելի քան 60 անձինք։ «Իմ կյանքի գույները» նախագծում ներգրավված են ժամանակակից պարի դասընթացի սկսնակ և միջին մակարդակները հաղթահարած մի խումբ շրջանավարտներ։ Նախագծի շրջանակում նրանք մասնակցել են շվեյցարացի արվեստագետ Ֆրանց Բրուլհարթի աշխատարանին՝ համադրելով պարն ու գույները։ Այդ ընթացքում ստեղծված աշխատանքներն էլ հիմք են ծառայելու «Իմ կյանքի գույները» նախագծի վիզուալների ստեղծման համար։ 

Այս փորձառությունը հնարավորություն է տալիս աշխատել ոլորտի առաջատար մասնագետների հետ, կիրառել և հարստացնել մինչ այժմ ձեռք բերած կատարողական հմտությունները, ստեղծագործել թիմով, առաջարկել խորեոգրաֆիկ լուծումներ և հանդես գալ բեմում։ 

Այժմ ընթանում են ներկայացման նախապատրաստական աշխատանքներն ու փորձերը։ Առաջնախաղի վերաբերյալ մանրամասները կենտրոնը կներկայացնի առաջիկայում։