«Սուրբ Աստվածածին» եկեղեցու վեր խոյացող գմբեթը թշնամուն ավելի շատ է սարսափեցնում, քան շրջափակումը՝ շոշեցիներին․Շոշում խուճապի նշույլ անգամ չկա

Ասկերանի շրջանի Շոշ գյուղի առօրյաի վրա շրջափակումը առանձնապես չի անդրադարձել․ «Հումանիտար աղետ ստեղծելու ճանապարհով արցախահայությանը վհատեցնելու Ադրբեջանի հաշվարկները չեն աշխատում։ Մեր գյուղը շրջափակման մեջ է 2020թ․-ից սկսած, գյուղից` 50-250-500 մետր հեռավորության վրա պարզ երևում են ադրբեջանական դիրքերը, շրջափակման մեջ ապրելը մեր համար նորություն չի։ Փառք Աստծո էսօր էլ գյուղում, որպես էդպիսին որեւէ խնդիր՝ ոչ հացի, ոչ ջրի, ոչ դեղի չկա։ Մեկս մեկով ապրում ենք, իմն ու քոնը չկա, մի տան պես ենք, մեզ ոչ զենքով, ոչ շրջափակումով չեն վախեցնի։  Ձմեռվա վառելափայտի հոգսՆ ԷԼ ժամանակին հոգացել ենք։ Վերջին ավելի քան երկու տարում, թշնամու քթի տակ ապրելով ու գրեթե ամեն օր առերեսվելով ադրբեջանական սադրանքներին, նման զարգացման սպասում էինք։ Էնպես որ, մեր գյուղի  «Սուրբ Աստվածածին» եկեղեցու վեր խոյացող գմբեթը թշնամուն ավելի շատ է սարսափեցնում, քան շրջափակումը՝ շոշեցիներին»-վստահեցնում է Շուշիին ամենամոտ գտվող գյուղի՝ Շոշի գյուղապետ Էրիկ Աբրահամյանը։