Ամանորին ինչ են դիտելու փոքրիկները Երեւանում

Ամանորը թատրոններում սիրված տոն է: Գրեթե բոլոր թատրոններում բեմադրիչները թերեւս ամենախստապահանջ հանդիսականի համբավն ունեցող երեխաների սիրտը շահելու համար ջանք ու եռանդ չեն խնայում: Դերասանները՝ առավել եւս. օրական խաղում են 2-4 ներկայացում: Ամանորի շնչով ողողված ներկայացումների մեկնարկը տրված է: Այն կշարունակվի մինչեւ դեկտեմբերի 30-ը, ապա 2023-ի հունվարի 3-8-ը:

Ալ. Սպենդիարյանի անվան օպերայի եւ բալետի ազգային ակադեմիական թատրոնն Ամանորին կներկայացնի ականավոր կոմպոզիտոր Պյոտր Չայկովսկու «Մարդուկ-Ջարդուկը» (Շչելկունչիկ) երկու գործողությամբ բալետային ներկայացումը` hամաշխարհային բալետային արվեստի ամենապահանջված ստեղծագործություններից մեկը: Ներկայացման բեմադրող բալետմայստերը ՌԴ արվեստի վաստակավոր գործիչ Գեորգի Կովտունն է, բեմադրության եւ զգեստների նկարիչը՝ Վյաչեսլավ Օկունեւը (ներկայացման երաժշտական ղեկավար եւ դիրիժոր` Կարեն Դուրգարյան): Իսկ Հովհ. Թումանյանի անվան տիկնիկային թատրոնն Ամանորին կներկայացնի «Սանտայի հյուրերը» երաժշտական ուրախ ներկայացումը (բեմադրիչ՝ Սամսոն Մովսեսյան):

Կ. Ստանիսլավսկու անվան ռուսական դրամատիկական թատրոնն Ամանորին կներկայացնի «Արքայադուստր գորտը» ներկայացումը՝ ըստ ռուսական ժողովրդական հեքիաթի: Ներկայացման բեմադրիչը թատրոնի գեղարվեստական ղեկավար Կարեն Ներսիսյանն է: Սա հեքիաթ է սիրո եւ հավատի մեծ ուժի մասին առ այն, որ ինչ դավեր էլ չարը նյութի, բարությունն ու սերը միշտ կհաղթեն: Ներկայացման բեմանկարիչը Արթուր Հարությունյանն է, զգեստների նկարիչը՝ Մարի Սարգսյանը, երաժշտական ձեւավորումը՝ Կարեն Ներսիսյանի, երաժշտությունը՝ Մարինա Լուկաշեւիչի, պարերը` Նունե Կիրակոսյանի: Ներկայացումը նախատեսված է տարբեր տարիքային խմբերի երեխաների համար:

Հ. Պարոնյանի անվան երաժշտական կոմեդիայի թատրոնի բեմ կբարձրանա «Մանչուկի եւ Կառլսոնի ամանորյա արկածները» տոնական ներկայացումը՝ ըստ Աստրիդ Լինդգրենի: Բեմադրությունը՝ Իշխան Ղարիբյանի, նկարիչ՝ Մարիամ Մուրադյան, պարերը՝ Նաիրա Հովհաննիսյանի, երաժշտական ձեւավորումը՝ Իշխան Ղարիբյանի:

Պատանի հանդիսատեսի թատրոնում հնարավոր կլինի դիտել Գրիմ եղբայրների «Բրեմենյան երաժիշտներ» հեքիաթի հիման վրա բեմադրված ներկայացումը, որը պատմում է թափառաշրջիկ երաժիշտների մասին: Ներկայացման գեղարվեստական ղեկավար՝ Հրաչյա Գասպարյան, բեմադրությունը՝ Արման Միրիջանյանի, նկարիչ՝ Անտոն Քեշիշյան, զգեստները՝ Նաիրա Նիազյանի պարերը՝ Անահիտ Ենոքյանի:

Հ. Ղափլանյանի անվան պետական դրամատիկական թատրոնի բեմ կբարձրանա «Ընկույզկոտրուկի գաղտնիքը» ներկայացումը, որի հիմքում Հոֆմանի «Մարդուկ-Ջարդուկը եւ մկների թագավորը» հայտնի հեքիաթն է: Հեքիաթի գործողությունները կատարվում են Ամանորի նախաշեմին (բեմադրությունը՝ Գրիգոր Խաչատրյանի)

«Փոքր» թատրոնի Ամանորի «Թեյախմություն Ձմեռ պապի հետ» ներկայացումը ինտերակտիվ է (բեմադրիչ՝ Վահան Բադալյան): Սիրված հերոսներն ու կերպարները հրավիրում են երկար սպասված հանդիպման եւ միասին թեյ խմելու. թեյնիկն արդեն կրակին է: Բայց դասական ներկայացման չսպասեք. դուք մասնակիցն եք լինելու իսկական թեյախմության՝ տարեմուտի ամենասպասված հյուրի՝ Ձմեռ Պապի հետ:

Գ. Սունդուկյանի անվան ազգային ակադեմիական թատրոնն Ամանորին փոքրիկների դատին կհանձնի «Մոխրոտը» կախարդական ներկայացումը՝ Լիլի Էլբակյանի ռեժիսուրայով:

Հ. Մալյանի անվան թատրոնում երեխաները կարող են դիտել «Հրաշագործ ճամպրուկը կամ էլֆերի նոր արկածները» Ամանորի ներկայացումը (hեղինակ՝ Աստղիկ Աբաջյան, բեմադրությունը՝ Նարինե Մալյանի):

Խամաճիկների թատրոնում կցուցադրվի «Սպիտակաձյունիկը» ներկայացումը: Բեմականացման եւ բեմադրության հեղինակ՝ Քրիստինե Ասրյան: Նկարիչը՝ Սուսաննա Հախվերդյանն է, կոմպոզիտորը՝ Մարտին Վարդազարյանը:

«Թատրոն Կայարանը» Ամանորին միանգամից երկու նոր ներկայացում է առաջարկում. մանկական՝ «Գրինչը» եւ մեծերի համար՝ «Մանդարինի լիկյոր»: Գրինչը եղել է տարբերվող Էլֆ՝ իր անսովոր արտաքինով: Մանկության տարիներին մշտապես ծաղրի է ենթարկվել բոլորի կողմից, այդ իսկ պատճառով որոշում է գողանալ Ամանորը, որպեսզի վրեժ լուծի: Սակայն… Չակերտները շատ չբացենք, հանդիսատեսն ինքն ականատես կլինի Գրինչի արկածներին (պիեսի հեղինակ՝ Դավիթ Անտոնյան, բեմադրությունը՝ Կարապետ Քարաջյանի, պարերը ՝ Աելիտա Գեւորգյանի):

Նշենք, որ տոմսերի արժեքը տատանվում է 1000-3000 դրամի սահմաններում: Դահլիճները ջեռուցվում են:

ՎԼԱԴ ՄՈՒՐԱԴՅԱՆ

Այս թեմայով Ռուսական դրամատիկական թատրոնը բացեց 89-րդ թատերաշրջանը «Սովորական պատմություն» ներկայացմամբ Այսօր Ալեքսանդր Սամսոնիչը կդառնար 90 տարեկան Թատրոնում երկրորդ դուբլ չկա․ Սուրենն ու Մագան անկեղծանում են Ներքին ագրեսիայով չի կարելի հասնել խաղաղության․ կայացավ «Մնա» ներկայացման առաջնախաղը «ՆեԵսենին»-ը գտավ իր տունը․ Բաբկեն Զաքարյան