Ազգի ՀԵՐՈՍ. անունդ պատմության էջերում ոսկե տառերով է գրվելու

2020 թվականի պարտության դառնահամը դեռ չմարսած, հուսահատության նոր ալիքներ են գալիս, որոնց դիմադրելը, հաճախ, շատ դժվար է դառնում: Պատերազմի ամենօրյա վտանգն առկախված է, իսկ կորուստների վերքերը նորոգվելու փոխարեն նորերով են բորբոքվում: Բայց երբ թվում էր՝ էլ ուժ չկա, 2022թ. սեպտեմբերին մեր սրտերը նորովի զինելու եկավ հայ զինվորի տեսանյութը, որն արհամարհանքով մերժեց հանձնվելու առաջարկը ու մինչեւ կյանքի վերջին ակնթարթը պայքարով հաստատեց հայրենիքի պաշտպանի իր կոչումը: Այդ զինվորը Տարոն Անդրեասյանն էր, Տարոնը, որը լույսի պես ճեղքելու եկավ հուսալքության ու վախի մթնոլորտը: Այսօր ՀԵՐՈՍԸ կդառնար 29 տարեկան։

Տարոնին ազգային հերոսի կոչմանը արժանացնելու հորդորով օրվա իշխանություններին դիմել, եւ բավականին կոշտ արձագանքել էր մեր գործընկեր Գայանե Զարգարյանը, պահանջելով օր առաջ մեր Տարոնին Ազգային Հերոսի կոչում շնորհել: Որը անարձագանք չէր մնացել, այդ մասին փաստել էր հերոսի հայրիկը` Հարություն Անդրեասյանը, <<Իրավունքի>> հետ զրույցում մասնավորապես ասելով․ <<Իշխանությունից մեզ տեղեկացրել են, որ քննարկում են Տարոնին կոչում շնորհելու հարցը, հիմա տեսենք, թեեւ դա մեր ցավը չի մեղմելու, բայց...>>։

Այսօր էլ՝ հավատարիմ մնալով հերոսներին հարգելու եւ նրանց սխրանքը հավերժացնելուն միտված իր յուօրինակ ձեռագրով եւ ամենօրյա գործունեությամբ հայտնի մեր գործընկեր Գայանե Զարգարյանը շնորհավորել է անմահ հերոսին հետեւյալ տողերով․

-ԱԶԳԻ ՀԵՐՈՍ ՇՆՈՐՀԱՎՈՐ ԵՐԿՆԱՅԻՆ ԾՆՈՒՆԴ ԱՆՈՒՆԴ ՊԱՏՄՈՒԹՅԱՆ ՄԵՋ ՈՍԿԵ ՏԱՌԵՐՈՎ Է ԳՐՎԵԼՈՒ ԽՈՆԱՐՀՈՒՄՍ ԹՈՂ ՈՐ ԿԱՐՈՂԱՆԱՆՔ ԱՐԺԱՆԻ ԼԻՆԵԼ ՍԽՐԱՆՔԻԴ ՄԵՐ ԱՆՊԱՐՏ ՀԱՅՈՐԴԻ։

Տարոն Անդրեասյանը ծնվել է 1993 թվականի դեկտեմբերի 25-ին: Մեծացել է Արարատի մարզի Մխչյան գյուղում: Նրա հայրը՝ Հարություն Անդրեասյանը 1990-ական թվականների Արցախյան պատերազմի մասնակից է: Տարոնը մանկուց եղել է ազատամարտիկների միջավայրում ու դաստիարակվել հայրենիքի հանդեպ պատասխանատվության գիտակցմամբ: Տարոնի անունն էլ Հարությունն իր մարտական ընկերոջ անունով է դրել։