Ամանորին ինչ թատերական նվերներ են պատրաստել մարզային թատրոնները

Ամանորի թատերական իրարանցումից անմասն չեն մնացել հանրապետության մարզային քաղաքների թատրոնները: Եվ նրանք էլ փոքրիկներին բազում անակնկալներ կմատուցեն տոն օրերին:

Գյումրու Վ. Աճեմյանի անվան դրամատիկական թատրոնը Ամանորին կցուցադրի «Մերին եւ ամանորյա հրաշքը» ներկայացումը: Բեմադրությունը` Լյուդվիգ Հարությունյանի, ռեժիսորի ասիստենտ եւ երաժշտական ձեւավորող` Արսեն Միքայելյան, նկարչական ձեւավորումը` Գարեգին Եվանգուլյանի, զգեստները` Լուսինե Խաչատրյանի:

Վանաձորի Հ. Աբելյանի անվան դրամատիկական թատրոնի բեմում Ամանորին կներկայացվի «Սառցե թագավորություն»՝ ըստ Հ. Ք. Անդերսենի: Բեմադրությունը՝ Սարգիս Մանուկյանի:

Գավառի Լեւոն Քալանթարի անվան պետական դրամատիկական թատրոնում Ամանորին կցուցադրվի «Ամանորի կախարդանքը»մանկական երաժշտական ներկայացումը: Բեմադրությունը եւ երաժշտական ձեւավորումը՝ Հովհաննես Օհանյանի, զգեստները՝ Ռուզաննա Պողոսյանի:

Արտաշատի Ամո Խարազյանի անվան դրամատիկական թատրոնի բեմում փոքրիկները կարող են դիտել «Ձնեմարդը» երաժշտական ներկայացումը, որը ամանորյա հրաշքի, ընկերության, համերաշխության եւ սիրո մասին է: Բեմադրությունը՝ Վյաչեսլավ Հայրապետյանի, նկարիչ՝ Սուսաննա Հախվերդյան:

Ամանորին Կապանի Ալ. Շիրվանզադեի անվան դրամատիկական թատրոնի բեմում կարող եք ականատես լինել Քրիստինե Ալոյանի «Կաղանդ պապի վերադարձը» ներկայացմանը: Բեմադրությունը՝ Անդրանիկ Խաչատրյանի, նկարիչներ՝ Արմինե Բաբայան, Վերա Պողոսյան, երաժշտությունը՝ Տիգրան Աթայանի, զգեստները՝ Արրեն Հայրապետյանի, պարերը՝ Գայանե Վարդիկյանի:

Աբովյանի դրամատիկական թատրոնը հրավիրում է ներկա գտնվելու «Կախարդական գիշեր» Ամանորի ուրախ ներկայացմանը: Հեղինակ եւ բեմադրիչ՝ թատրոնի գեղարվեստական ղեկավար Արմեն Սարգսյան:​

Իսկ Հրազդանի դրամատիկական թատրոնի բեմում կլինի «Բուրատինոյի ամանորյա արկածները»՝ բեմադրիչ Իշխան Ղարիբյանի ռեժիսուրայով, պարերը՝ Ռուզաննա Ղազարյանի:

ՎԼԱԴ ՄՈՒՐԱԴՅԱՆ