Եթե Արցախում կյանքեր են վտանգված, ապա Հայաստանում եւս ապահով չէ. Աննա Մանգասարյան

Արցախցի ԱՆՆԱ ՄԱՆԳԱՍԱՐՅԱՆԸ գրեթե մեկ ամիս է, ինչ մնացել է Երեւանում եւ ստիպված է իր անչափահաս երեխայից հեռու ապրել՝ Արցախը Հայաստանին կապող կյանքի ճանապարհի փակ լինելու պատճառով: Այս մասին «Իրավունքը» զրուցել է նրա հետ։

- Ստեղծված իրավիճակում Արցախի թիվ մեկ գործողությունը ո՞րը պետք է լինի։

- Ես հասկանում եմ, որ Արցախը նախ եւ առաջ պետք է Հայաստանի հետ այդքան հույս չկապի, միջազգային ատյանների, կառույցների հետ իր գործողությունները ծավալի, քանի որ Հայաստանի իշխանություններն իրենց պահվածքով եւ գործողություններով հասկացնում են, որ իրենք ձեռքերը լվացել են Արցախից: Որպես քաղաքացի՝ ես այդպես եմ մտածում։

- Տիկին Մանգասարյան, այսինքն՝ Հայաստանի վրա այլեւս հույս չե՞ք դնում։

- Ես չեմ կարող միանգամից հույսս կտրել, գուցե ինչ-որ բան անի, քանի որ նա է հանդիսանում Արցախի երաշխավորը։ Նա է ասել, որ սկսում է բանակցությունները զրոյական կետից, նա է Արցախը հասցրել այս վիճակին։ Դե հիմա թող իր արածի տակից մի կերպ դուրս գա, առանց որեւիցե տարածքի զիջման, թող ճանապարհի հարցը կարգավորի։ Չլինի այնպես, որ նա Արցախի ճանապարհների բացումը կապի ինչ-որ տարածքների հանձման հետ՝ ասելով, որ 120 հազար մարդու կյանք փրկեցի։ Այդ գնով պետք չի 120 հազար մարդու կյանք փրկել։ Պետք է հարցը կարգավորել՝ առանց տարածքային զիջումների։ Ցանկալի է, որ դիվանագիտական ճանապարհներով կարողանան հարցին լուծում տալ։

- Ի՞նչ հանգուցալուծում եք տեսնում, հնարավո՞ր է հարցը լուծել խաղաղ ճանապարհով։

- Դա ամենացանկալին է, բայց ինչքան ձգձգվում է խաղաղ ճանապարհով լուծումը, դժվար եմ պատկերացնում։ Բայց դեռ հույս ունեմ, որ խաղաղ ճանապարհով կլուծվի հարցը։

- Ներկա պահին որտե՞ղ է գտնվում ձեր երեխան, ի՞նչ պայմաններում։ Սննդային, դեղորայքային պաշարներ կա՞ն։

- Երեխան գտնվում է Արցախում ՝ մեր տանը ՝ իր հայրիկի մոտ: Սնունդ որոշ չափով կա, սակայն ելնելով ստեղծված իրավիճակից՝ գնալով այդ հարցը շատ է սրվելու։ Խանութներում պարենային ապրանքներ չկան։ Հերթը հասել է կենցաղային ապրանքներին։ Դեղորայքային պաշարներ ընդհանրապես չկան։ Երեկ երեխային դեղ էր հարկավոր, ամուսինս ման է եկել ամբողջ քաղաքում եւ սովորական նոշպա չի կարողացել գտնել։ Հիգենայի պարագաներ ընդհանրապես չկան։

- Եթե ճանապարհը բացվի կշարունակե՞ք ապրել Արցախում։ Չէ ՞որ ամեն րոպե կարող է վտանգվել ոչ միայն Ձեր, այլեւ Ձեր ընտանիքի անդամների կյանքը։

- Միանշանակ՝ այո, ես ուրիշ տարբերակ չեմ տեսնում։ Եթե վերցնենք, որ Արցախում կյանքեր են վտանգված, ապա Հայաստանում եւս ապահով չէ։ Եթե բոլորս այդպես մտածենք եւ երկիրը լքենք, իսկ ո՞վ է պահելու մեր երկիրը։ Չպետք է տրվենք նրանց սադրանքներին։ Ադրբեջանը հենց ձգտում է հայաթափել Արցախը եւ ունենալ Արցախ՝ առանց հայի։ Իսկ ինչքանով է ճիշտ, որ մենք պարենք նրանց նվագի տակ։ Իմ շրջապատում չկա մարդ, որ այս սադրանքից հետո մտածի Արցախը լքելու մասին։

ԼԻԼԻԹ ՀԱՐՈՒԹՅՈՒՆՅԱՆ

Այս թեմայով Վեճ՝ արցախցիների հարցով քննարկման ընթացքում․ ՔՊ-ն լքեց դահլիճը․ «Չեմ հասկանում՝ ով է հարցը լուծելու» Եվրոպան՝ իր քաղաքացիներին Ռուսաստանի դեմ պատերազմի է պատրաստում. Աբրահամյան Անբարոյական մոտեցում է, եթե ՊՆ նախարարը գտնում է, որ բանակի ողբերգական դեպքերում իր մեղքը չկա Ի՞նչ են քննարկել «Ուժեղ Հայաստան»-ի եւ «Հայաստան»-ի ղեկավարները 2023 թվականի սեպտեմբերի 19–20-ը ավարտվեց ոչ միայն պատերազմը, այլ նաև Արցախի հայկական պետականության մի ամբողջ պատմաշրջան