Ի զեն՝ չզիջել, չհանձնվել, պայքարել. Համահայկական ԳՄ-ի կոչը՝ հայ ժողովրդին

Սիրելի ժողովուրդ Հայոց,

 

Այս դժվար օրերին Հայ մտավորականությունը պարտավորություն ունի ոչ միայն հոգեպես սատար լինել պայքարող Արցախին, այլեւ ցույց տալ կոնկրետ անելիքներ, գործողություններ, որոնք դուրս կբերեն մեզ ստեղծված փակուղային կացությունից: Համահայկական գերագույն մարմինը, որ ստեղծվել է Սփյուռքի եւ Հայրենի մտավորականության համախմբման արդյունքում, մերժելի է համարում հուսալքման ամեն մի դրսեւորում` ում կողմից էլ այն կատարվի: Մեր առջեւ կա երկու ճանապարհ միայն` պաշտպանվել կամ հանձնվել: Մեր ժողովուրդն ընտրել է պայքարի ուղին` վկա պայքարող Արցախը: Չենք հանձնվելու ոչ մի դեպքում, չենք զիջելու: Վերջին ամիսների դառը փորձը մեզ ապացույց` հեշտությամբ հանձնված Բերձորն ու Աղավնոն նոր փորձանքների ու պատերազմի դուռ բացեցին:

 

Թշնամին պիտի տեսնի մեր միահամուռ եւ անզիջում կամքը: Աշխարհը պիտի տեսնի Հայության միասնականությունը: Մենք կարող ենք Լաչինի միջանցքի փակումն Ադրբեջանի կողմից դարձնել Աշխարհի առջեւ ցցուն ապացույց` թե ինչու Արցախը չի կարող լինել Արդրբեջանի կազմում եւ պիտի լինի միայն անկախ: Վերադարձնել Արցախն Ադրբեջանի կազմ` նշանակում է մահվան վճիռ հազարամյակներ իր հողի վրա ապրած քաջարի արցախահայերի: Ուրեմն ի զեն` գործենք միասին: Մենք հնարավորություն կգտնենք սնունդ ուղարկելու շրջափակված մեր հայրենակիցներին: Իսկ Ադրբեջանը կշարունակի փակ պահել Լաչինի միջանցքը` վերջնականորեն խայտառակվելով մարդկության առաջ: Դրա համար համախումբ պիտի գործի նաեւ մեր Սփյուռքը` աշխարհին ներկայացնելով Ադրբեջանի ցեղասպան դեմքը: Ժամանակի հրամայականն է` չզիջել, չհանձնվել, պայքարել: Այդպես միայն ձեռք կբերենք բարեկամներ ու դաշնակիցներ: