Ամեն սցենար էլ հնարավոր է, եթե հասնենք կրիտիկական կետի. ԱՀ ԱԺ պատգամավորը Լաչինի միջանցքի շուրջ հնարավոր զարգացումների մասին

Մեկ ամիս է ինչ Արցախը իր 120. 000 հազար բնակչով գտնվում է շրջափակման մեջ՛ Նկատի ունենալով ընթացող զարգացումները՝ խնդիրն ինչպե՞ս է հանգուցալուծվելու: Ի վերջո, Լաչինի միջանցքի բացման մասով ի՞նչ զարգացում են կանխատեսում Արցախում հարցերի պատասխանը փորձել ենք ստանալ  Արցախի Հանրապետության Ազգային Ժողովի «Ազատ հայրենիք- ՔՄԴ» խմբակցության ղեկավար  Արթուր Հարությունյանից, ով նախ անդրադարձավ Արցախում ժամ առ ժամ սրվող հումանիտար իրավիճակին.

-Արցախում հումանիտար իրավիճակը ծայրահեղ ծանր է, արդեն իսկ անկհայտ երեւում է հումանիտար աղետի հետեւանքները պարենային ապրանքների, դեղամիջոցների, դիզվառելիքի եւ առհասարակ վառելիքի մասով: Շատ լուրջ խնդիրներ են սկսել առաջանալ, ինչը հանգեցրել է կտրոնային համակարգին անցնելու որոշումների կայացմանը, որպեսզի կարողանանք հավասարաչափ բաշխել ունեցած պաշարները եւ հնարավորինս երկար կարողանանք, այսպես ասած, գոյություն պահպաննել: 

Գիտեք, որ բանակցություննեևը մինչ օրս որեւէ արդյունք չեն տվել, իսկ երեկվանից Արցախը ՀՀ–ից սնուցող միակ բարձրավոլտ գծում դեռեւս անհայտ պայմաններում արձանագրվել է վթար, Ադրբեջանը թույլ չի տալիս կազմակերպել վերականգնողական աշխատանքներ, անգամ ռուս խաղաղապահներին թույլ չեն տալիս մոտենալ վթարի վայր: Ինչը թույլ է տալիս ենթադրել, որ տվյալ գիծը վնասել է ադրբեջանական կողմը: Այսինքն գնալով ճգնաժամը ավելի է խորանում, իհարկե փորձելու ենք մեր ներքին ունեցած ռեսուրսներով, ունեցած պաշարներով գոյություն պահպաննել, թե որքան դժվար է ասել:

-Որքա՞ն հնարավոր կլինի դիմակայել ունեցած ռեսուրսներով:

-Ժամկետների առումով չեմ կարող հստակ ոչինչ ասել, բայց որոշակի ապրանքների մասով ունենք պաշարներ, բայց կան ապրանքներ, որոնց մասով առհասարակ պաշարները սպառվել են, իրենց հետ բելերով լրջագույն խնդիրներ:

-Ի՞նչ զարգացումներ եք կանխատեսում միջանցքի բացման շուրջ:

-Այս պահի դրությամբ ակնկալում ենք բանակցությունների վերսկսում եւ օր առաջ միջանցքի բացում: Այսինքն այս պահին ակնկալում ենք ռուս խաղաղապահների գործուն ջանքերով միջանցքի բացմանը ուղղված քայլեր, մենք տեսնում ենք, որ խաղաղապահները իրենց հերթին դրան ուղղված քայլեր են իրականացնում:

-Կարծիքներ են հնչում, որ Լաչինի միջանցքը միայն պատերազմով կբացվի, որքանո՞վ եք հնարավոր համարում այդ սցենարը։

-Ամեն սցենար էլ հնարավոր է, եթե հասնենք կրիտիկական կետի, չեմ ցանկանում ավելի խորը մեկնաբանել այս պահին: Համենայնդեպս այս պահին փորձում են ռուս խաղաղապահների միջոցով հասնել միջանցքի բացմանը, քանի որ նոյեմբերի 9-ի փաստաթղթով կա հստակ գրավոր համաձայնություն: Իսկ ընդհանուր առմամբ տեսականորեն բոլոր սցենարներն էլ հնարավոր են:

-Պարոն Հարությունյան, այսօր Նիկոլ Փաշինյանը ասուլիսի ընթացքում մասնավորապես ասել է. «Բանակցությունների ընթացքում մենք ԼՂ-ի, ԼՂ ժողովրդի ճակատագիրը որոշելու հավակնություն չենք ցուցաբերումՄենք բանակցում ենք այն մասին, որ պետք է միջազգայնորեն տեսանելի խոսակցություն տեղի ունենա ԼՂ հայության և Ադրբեջանի միջև՝ Բաքվի և Ստեփանակերտի միջև»: 

-Արցախի ապագայի շահառուն ողջ հայ ժողովուրդն է, և Հայաստանի ու Արցախի շահերը պետք է դիտարկել մեկ ամբողջության մեջ: Բայց քանի դեռ Արցախի Հանրապետությունը չի ընդգրկվել հակամարտության կարգավորման գործընթացում լիիրավ հիմունքներով և միջազգային բարձր ձևաչափի շրջանակներում, Հայաստանի Հանրապետությունն է պարտավորված ու լիազորված ներկայացնելու և պաշտպանելու Արցախի ժողովրդի իրավունքներն ու շահերը միջազգային հարթակներում: Այդ պարտավորություններն ու լիազորություններն ամրագրված են Հայաստանի Հանրապետության ներպետական և միջազգային մի շարք փաստաթղթերով, այդ թվում՝ ԵԱՀԿ փաստաթղթերով և 2020թ. նոյեմբերի 9-ի եռակողմ հայտարարությամբ: Ուստի, մենք պատրաստ ենք Ադրբեջանի հետ բանակցություններ վարել հակամարտության կարգավորման շուրջ՝ բանակցային լիարժեք ձևաչափի վերականգնման դեպքում, որտեղ Արցախի Հանրապետությունը ճանաչված է որպես լիիրավ կողմ: 

Զրույցը` ԻԼՈՆԱ ԱԶԱՐՅԱՆԻ