Ադրբեջանը ցանկանում է մասսայական ձերբակալման կետերի վերածել ԱՀ տանող ճանապարհը, իսկ մենք չենք ենթարկվելու` գնալու ենք հարցի միջազգանացման ճանապարհով. Վահան Բադասյան

Արցախի նախագահի հատուկ հանձնարարությունների գծով ներկայացուցիչ Վահան Բադասյանից փորձել ենք հետաքրքրվել, թե ինչպես են վերաբերում Արցախում Նիկոլ Փաշինյանի վերջին ասուլիսում հնչեցրած հայտարարություններին, որոնցով մեկ անգամ եւս պաշտոնապես վերջինս, այսպես ասած, ձեռքերը լվացրեց Արցախից իր 120. հազար հայրենակիցներով.
-Գիտեք, մենք ապրում ենք մեր պատմության ամենաղբերգիկ եւ դժբախտ ժամանակաշրջանը: Չի եղել նման դեպք, երբ նենգաբար, հակասահմանադրական ճանապարհով իշխանությունը զավթած իշխանական խումբը կանխամտածված երկիրը տանի կործանման: Նրանք վստահ էին, որ Արցախը հանձնելով Հայաստանը լավ կապրի, բայց դրանում համոզվեցին թե՛ իշխանականները, թե՛ առհասարակ այդ միֆին հավատացողները: Ես նրա ասուլիսից մի քանի դրվագ եմ նայել եւ ինչպես եւ սպասվում էր, նա մանիպուլյատիվ ձեւով շրջանցում էր բոլոր պատասխանատու հարցերին պատասխանելը: Փաշինյանը շարունակում է կործանել երկիրը, պատերազմից հետո դեռեւս կար ՀՀ-ն փրկելու ուղղիներ, բայց այդ բոլոր ուղղիները Փաշինյանը ճարպկորեն կարողացավ արգելափակել` բերելով ասպարեզ հանցավոր հներին: Որպեսզի հասարակությունը հների ու նորերի միջեւ ընտրի կրկին իրեն ու այդպես էլ եղավ: 

Նիկոլը երկիրը հասցրեց նրան, որ այլեւս ՀՀ-ից չի կախված ո՛չ ՀՀ-ի, ո՛չ էլ առավելեւս Արցախի ապագան: Այսօր աշխարհաքաղաքական այնպիսի վիճակ է ստացվել, որ այլեւս ՀՀ-ից որեւէ մեկը որեւէ բան չի հարցնելու: Մի բան վստահ կարող եմ ասել, որ Արցախը չի ընկնելու, որվհետեւ Արցախի մնալը, որպես կոնֆլիկտային տարածք անհրաժեշտ է թե՛ ՌԴ-ին, թե՛ Արեւմուտքին, որպեսզի Թուրքիան կախված լինի իրենցից:

Մեզանից` արցախցիներիցս հիմա մի բան է կախված, հնարավորինս դիմակայել այս ծանր շրջանում, մինչեւ ջրերը պարզվեն: Արցախի հարցը այլեւս միջազգայնացվում է, եւ հարցի միջազգայնացումը այսօր միայն ու միայն կփրկի մեզ:

-Արցախում մտավախություն չկա՞, որ հաջորդ քայլով, օրինակ Փաշինյանը կզրկի Արցախին ֆիննանսավորումից, հայկական անձնագրերը չեղարկելուն քայլերի գնա ու այդպես շարունակ:

-Նիկոլից ամեն ինչ էլ սպասելի է, նման մտավախություն կա, բայց դրա դեմն էլ կարելի է առնել, ոնց դեռ չգիտեմ, բայց ցանկացած հարց ունի իր լուծումը, կարեւորը մենք ունենք այդ կամքը ցանկացած խնդրի դիմակայելու: 

-Լավ, ինչպե՞ս եք տեսնում Լաչինի միջանցքի բացման հանգուցալուծումը:

-Նրանց որեւէ նախապայմանի մենք կուլ չենք գնալու, իրենք ասում են եկեք անցակետեր դնենք, դա նույնն է, ինչ գալը գառանն ասի` արի դու իմ հովանու տակ ապրի, քեզ ոչ ոք ձեռք չի տալու: Անցակետեր տեղադրելու նպատակը մեկն է` Ադրբեջանը ցանկանում է մասսայական ձերբակալման կետերի վերածել Արցախ տանող ճանապարհը, մենք չենք գնալու այդ քայլին: Մենք կդիմանանք ինչքան պետք է, բայց կուլ չենք գնալու:

Զրույցը` ԻԼՈՆԱ ԱԶԱՐՅԱՆԻ