Հունվարի 1-ից 300 մանկավարժ և մոտ 400 այլ աշխատակից մնացել է առանց աշխատանքի․ԱՀ Քաշաթաղի շրջանի ԿԳՄՍ բաժնի վարիչ

Քաշաթաղի շրջանից բռնի տեղահանված, իսկ հունվարի 1-ից պաշտոնապես գործազուրկ դարձած ուսուցիչների հետագա ճակատագրի եւ առկա մարտահրավերների մասին զրուցել ենք ԱՀ Քաշաթաղի շրջանի ԿԳՄՍ բաժնի վարիչ ՎԱՐԴՈՒՇ ՄՈՎՍԻՍՅԱՆԻ հետ, ով փաստեց վերը նշվածը մանրամասնելով․

-ԱՀ կառավարության համապատասխան որոշումների համաձայն ս/թ հունվարի մեկից լուծարվել է Քաշաթաղի շրջանի 52 հանրակրթական և 3 նախադպրոցական ուսումնական հաստատություն, դպրոցները ֆինանսատնտեսական հարցերով զբաղվող մեկ ՊՈԱԿ և մեկ մարզադպրոց։ Լուծարված կազմակերպություններ ավելի քան 300 մանկավարժ և մոտ 400 այլ աշխատակից մնացել է առանց աշխատանքի։ Լուծարման մասին որոշումները որոշ ժամկետով երկարաձգելու միջնորդություն ներկայացնելու խնդրանքով կազմակերպությունների տնօրենները դիմել են Քաշաթաղի շրջանի վարչակազմի ղեկավարին և ԱՀ իշխանության մարմիններին։ Այս պահին որևէ պատասխան չի ստացվել։ Հունվարի 1-ից աշխատողները փաստացի ազատված են աշխատանքից։

Անդրադառնալով նրանց հետագա ճակատագրին եւ հնարավոր նոր աշխատատեղերով ապահովվելուն միտված քայլերին մեր զրուցակիցը ընդգծում է․

-ՀՀ-ում տեղահանված մանկավարժներին համապատասխան աշխատանքով ապահովվելու համար միջոցներ ձեռնարկելու համար 2022 թ դեկտեմբերի 24ին դիմել եմ ԱՀ ԿԳՄՍ նախարարին՝ ՀՀ ԿԳՄՍ։ նախարարություն միջնորդություն ներկայացնելու խնդրանքով։ Առայժմ որևէ պատասխան չեմ ստացել։

Մանկավարժների համապատասխան աշխատանքով ապահովելու նպատակով ԱՀ օպերատիվ շտաբի պետ Մ.Վիրաբյանի հետ հարցի մանրամասն քննարկումից հետո կապ եմ հաստատել ՀՀ մարզերի և ք. Երևանի հանրակրթության վարչությունների պետերի մեծ մասի հետ։ Նախատեսվել են հանդիպումներ, որոնց ընթացքում կփորձենք գտնել ելքեր տեղահանված մանկավարժներին աշխատանքով ապահովելու համար։

ԻԼՈՆԱ ԱԶԱՐՅԱՆ