Մեզ ոչնչացնել պատրաստվող թշնամուն պետք է ատամ ցույց տալ. Մանգասարյան

Այն, որ Ալիեւն իր վերջին հարցազրույցում նշել է, թե հնարավոր է, որ իրենք որոշեն որտեղով է անցնելու հայ-ադրբեջանական սահմանը, ըստ «Հենակետ» վերլուծական կենտրոնի ղեկավար, ռազմական փորձագետ ՎԻՏԱԼԻ ՄԱՆԳԱՍԱՐՅԱՆԻ, փաստացի ագրեսիայի քայլ է մեր սուվերեն տարածքի հանդեպ:

— Մենք արդեն 140 քառ. կմ տարածք ենք կորցրել ՀՀ սուվերեն տարածքից: Էջմիածնի չափով 3-4 անգամ ավել տարածք: Սրան զուգահեռ՝ Ադրբեջանը պնդում է, որ իր ուզած պահին, երբ որեւէ բան իր սրտով չլինի, կանեն այնպես, որ ՀՀ-Ադրբեջան սահմանն անցնի իրենց ուզած ձեւով: Սա նշանակում է, որ իր պլաններում ոչ միայն Սոթք-Խոզնավար հատվածում տեղակայվելն է, այլեւ երկարաժամկետ հեռանկարում նույն հատվածի իրենց բարենպաստ դիրքերից հետագա առաջխաղացման համար հիմքեր ստեղծելը: Նրանց կողմից տարբեր ռազմավարական բարձունքներ գրավելու իմաստը միջնաժամկետ եւ երկարաժամկետ հեռանկարում պարզ է: Ադրբեջանը նվազագույնն ուզում է վերահսկել ռազմավարական ճանապարհը Սիսիան-Գորիս հատվածում, այսինքն` Երեւան-Սյունիք ճանապարհը: Իսկ առավելագույնը` իրենք կորոշեն, թե սահմանը որտեղով կանցնի: Բնականաբար, որքան խորք գան, այնքան կլուծեն խնդիրը:

— Այս համատեքստում ի՞նչ է անում Հայաստանն ու ինչպե՞ս է պատրաստվում դիմակայել:

— Երկրի ղեկավարի մակարդակով ասվում է, թե Ադրբեջանն ուզում է մեզ ցեղասպանել: Եթե նշյալն արձանագրում ենք եւ հասկանում, որ Ադրբեջանը նման մտադրություն ունի, ապա հարց է առաջանում` որո՞նք են մեր հակազդող քայլերը: Առնվազն պետք է պայքարել եւ ցույց տալ, որ կարող ենք հաջողության հասնել: Մինչդեռ պետական բարձր մակարդակներում հնչում են աբսուրդային հայտարարություններ, թե մենք թույլ ենք, չենք կարող կռիվ տալ թուրք-ադրբեջանական տանդեմի դեմ: Իսկ ո՞վ է ասել, որ ճիշտ կառավարման դեպքում, մարդկանց համախմբելու եւ ազգային նպատակ սահմանելու պարագայում չենք կարող ինչ-որ բան անել, եթե հանկարծ թշնամու տանկերը հայտնվեն Էջմիածնում: Այդ ո՞վ է հաշվարկել, որ հնարավոր չէ: Հնարավոր է, եթե մարդիկ տեղում լինեն: Մեզ ոչնչացնել պատրաստվող թշնամուն պետք է ատամ ցույց տալ, եւ պարզ է, որ դա դժվար ու ծանր է լինելու: Իմ գնահատմամբ՝ կարող ենք հաղթահարել, մինչդեռ ղեկավարությունը հակառակն է պնդում: Նման բան ասող իշխանությունն օր առաջ պետք է հեռանա, եւ պետք է գան նրանք, ովքեր վստահ են, որ հնարավոր է:

— Բայց Նիկոլ Փաշինյանը հայտարարում է, թե միջազգային հանրությունն այսօր էլ, երեկ էլ ԼՂ-ն ընդունել է` որպես Ադրբեջանի մաս…

— Նման պնդումից հետո մենք ուժեղացա՞նք, թե թուլացանք: Միջազգային հանրությունը պատերազմից հետո քանիցս ԵԱՀԿ Մինսկի խմբի մակարդակով հայտարարել է, որ արցախյան հիմնախնդիրը լուծված չէ եւ պետք է լուծվի ընդունված սկզբունքների շրջանակում: Փաշինյանի այս հայտարարությամբ ոչ միայն Ալիեւի բերանն ենք լեզու դնում, որ հետո մեր ճակատին տա, այլեւ վարկաբեկում ենք միջազգային հանրությանը, եւ վերջինիս ստախոս «հանում»: Մինչդեռ ինքնորոշման իրավունքը տեղ էր գտել այդ սկզբունքներում: Պարզ չէ՞, որ նման հայտարարությունը մեզ միայն վնաս է տալիս: Առաջնային մանդատ կրող կառույցի` ԱԺ իշխանական խմբակցության պատգամավորներից մեկը պնդում է հնչեցրել, թե Լաչինը պատմական ադրբեջանական տարածք է: Հասկանո՞ւմ են «պատմական» բառի հետեւանքը: Սրանով սերունդներին ժառանգություն ենք թողում, որ վաղը, երբ իշխանություն փոխվի եւ ելույթ ունենան միջազգային ամբիոնից, Ադրբեջանն այդ հայտարարություններով թղթերը շպրտելու է մեր դեմքին:

ՀՐԱՆՏ ՍԱՐԱՖՅԱՆ

Այս թեմայով 2024 թվականին Պենտագոնը կտրուկ ավելացրել է Հայաստանի ռազմական ֆինանսավորումը Գերմանիայի ամերիկյան Շպանգդալեմ ավիաբազայում ռազմական ինքնաթիռ է կործանվել ԻՀՊԿ. Գերմանիայում կայացած գաղտնի հանդիպման ժամանակ որոշվել է ռազմական գործողություններ ձեռնարկել Իրանի և Եմենի դեմ  Ամերիկյան գերգաղտնի ռազմական բեռը սխալմամբ ուղարկվել է... Չինաստան 2023 թվականի սեպտեմբերի 19–20-ը ավարտվեց ոչ միայն պատերազմը, այլ նաև Արցախի հայկական պետականության մի ամբողջ պատմաշրջան