Անորոշությունը մեզ ստիպում է ավելի ուժեղանալ ու ոչ մի դեպքում գլուխ չխոնարհել․ ԱՀ Փաստաբանների պալատի նախագահ

Ինչպե՞ս է արցախցին առկա անորոշության պայմաններում դիմակայում օր-օրի ահագնացող մարտահրավերներին, ինչն՞ է արցախցուն ստիպում չընկրկել այս եւ այլ հարցերի պատասխաններ փորձել ենք ստանալ ԱՀ Փաստաբանների պալատի նախագահ ԷՐԻԿ ԲԵԳԼԱՐՅԱՆԻՑ, ով նախ փաստեց․

-Ստեփանակերտ-Գորիս մայրուղու շրջափակումն աղրբեջանցիների կողմից Արցախում ստեղծել է ճգնաժամ։ Արցախը և արցախցին առաջին անգամ չէ,որ կանգնում է նման աղետի առաջ, սակայն արցախցին չի ընկճվում, չի թուլանում և հայի ոգով փորձում է պատվով հաղթահարել այս ամենը։ Ճիշտ է, դժվարություններ շատ կան, բայց արցախցին ստեղծող և արարող է և ոչ մի անհաղթահարելի պատնեշ գոյություն չունի արցախցու համար։ Մենք մեր արմատներով կառչած ենք մեր հողին և մեր համար ամեն մի թիզ հող թանկ է։ Ստեղծված անորոշությունն ու թշնամու մարտահրավերները մեզ ստիպում է ավելի ուժեղանալ և ոչ մի դեպքում գլուխ չխոնարհել։

-Բերձորի միջանցքի շուրջ ստեղծված իրավիճակի հանգուցալուծումն, իմ կարծիքով, մեկն է` խաղաղ բանակցություններ և Արցախի վերջնական կարգավիճակ։ Բայց Արցախն ոչ մի դեպքում չի կարող լինել Ադրբեջանի կազմում։ Նշեմ, որ 2020թ. նոյեմբերի 10-ի պայմանավորվածության համաձայն ռուս խաղաղապահները պարտավոր են առանց խոչընդոտի ապահովել արցախցիների շարժը դեպի ՀՀ և հակառակ ուղղությամբ։

-Շուրջ 61 օր է Արցախ աշխարհը Ադրբեջանը պահում է շրջափակման մեջ։Կարմիր խաչի միջազգային կոմիտեի միջամտությամբ առողջական խնդիրներ ունեցող մեր քաղաքացիները տեղափոխվում են Հայաստանի Հանրապետություն,բայց այսքանով մեր խնդիրները չի վերջանում։ Մենք ունենք էլեկտրաէներգիայի մատակարարման խնդիր, անընդհատ արգելափակում են Արցախ մտնող գազատարը, արցախցին զրկված է ուտելիքից։ Եվ այս ամենն ոչ մի երկրի չի հուզում ու լուռ է աշխարհը, կույր են բոլորը։

Գտնում եմ, որ միջազգային հանրությունը պետք է իր ձայնը բարձրացնի հանուն Արցախի,հանուն արցախցու բարեկեցիկ և անվանտգ ապագայի։ Վերջնական լուծումը մեկն է` Արցախին կարգավիճակ տալը, բայց ոչ Ադրբեջանի կազմում։