Մեծաթիվ մարդիկ անօթևան մնացին, վրանների կարիք կա, կերակրի կարիք կա, հոսանքն անջատված է․ Իրավիճակը Թուրքիայում այսօր

Թուրքիրայի 10 նահանգներում արտակարգ դրություն է սահմանվում։ Ի՞նչ է դա ենթադրում, ի՞նչ սահմանափակումներ են գործելու այդ ընթացքում, այս եւ այլ հարցերի պատասխաններ փորձել ենք ստանալ Թուրքիայում գործող «Ակօս» թերթի հայկական բաժնի խմբագիր Բագրատ Էստուկյանից, ով նախ փաստեց․

-Երկրաշարժի հետեւանքով մեծաթիվ մարդիկ անօթևան մնացին, վրանների կարիք կա, կերակրի կարիք կա։ Շատ վայրերում հոսանքն անջատված է։ Նույնիսկ բենզին չեն մատակարարում։ Բենզինի լիցքակայաններն աշխատում են միայն պաշտոնական ինքնաշարժների  ու պետական ծառայության ինքնաշարժների համար։ Այնտեղից դուրս եկող քաղաքացիական ինքնաշարժերի համար բենզին կամ դիզել չեն մատակարարում։ Այսինքն՝ շատ դժվար կացություն է ամբողջ երկրում ։

Ինչ վերաբերում է արտակարգ դրությանը, ապա, բնականաբար,  արտակարգ իրավիճակի սահմանումը նշանակում է քաղաքացիների ազատությունների սահմանափակում։ Ինչո՞ւ նման կարիք տեսավ նախագահ Էրդողանը․ անմիջապես պետք է ասենք, որ չորս ամիս հետո Թուրքիայում ընտրություններ են լինելու, և դրանց նախօրեին նման քայլը քաղաքական նպատակներ է հետապնդում։ Բավական վիճելի հարց է՝ այս պահին արտակարգ իրավիճակ հայտարարելու կարիք կա՞ր, թե՞ ոչ։ Միգուցե, ավելի տեղին կլիներ այդ տարածքներն աղետի գոտի հռչակել և աղետյալ ժողովրդին որոշ պարտավորություններից զերծ պահել, օրինակ՝ հարկերից ազատել կամ որոշակի օժանդակություն կազմակերպել, այլ ոչ թե նրանց առօրյա կյանքը սահմանափակող որոշումներ կայացնել։