«Ինձ թվում է՝ հինգ գիրք գրած գրողն արդեն նվիրել է իր գրքերը ժողովրդին».ՀՈՎԻԿ ԱՖՅԱՆ

Հայաստանում փետրվարի 19-ին նշվում է  Գիրք նվիրելու օրը: Օրվա ընտրությունը պայմանավորված է մեծ գրող, բանաստեղծ, հասարակական գործիչ  Հովհաննես Թումանյանի ծննդյան տոնով: Այդ օրվա առիթով հանրապետությունում գրքին նվիրված տարբեր միջոցառումներ են անցկացվում, կազմակերպվում են հայ գրողների հետ հանդիպումներ, արդեն մի քանի տարի է, ինչ օրը նշանավորվում է միմյանց գիրք նվիրելով:  Իսկ թե ի՞նչ գիրք կնվիրեր իշխանությանը, ընդդիմությանը եւ ժողովրդին տոնի առթիվ սցենարիստ, գրող, արձակագիր ՀՈՎԻԿ ԱՖՅԱՆԸ իմացանք նրա հետ ունեցած զրույցից:

— Իշխանությունն ու ընդդիմությունը իրականում ժամանակավոր բաներ են, ինչպես օրինակ, վատ գրականությունը: Այսօր կարդում ես, վաղն արդեն ակտուալ չէ: Բայց ի տարբերություն ընդդիմության, իշխանությունը որպես կանոն, համոզված է իր հավերժության մեջ: Ցանկացած իշխանություն: Հենց դրա համար էլ իշխանությանը կնվիրեի Մարկեսի ոչ շատ հայտնի «Գեներալն իր լաբիրինթոսում» գիրքը, որտեղ Սիմոն Բոլիվարն իր վերջին ճանապարհորդությունն է անում Մագդալենա գետով՝ համոզվելով, որ ի տարբերություն գետի` ինքը հավերժ չէ: Իսկ ընդդիմությանը կնվիրեի հայ ժողովրդական հեքիաթների ժողովածու, որպեսզի ավելի լավ ճանաչի մեր ժողովրդին: Ա՛յ, ժողովրդին... Ինձ թվում է՝ հինգ գիրք գրած գրողն արդեն նվիրել է իր գրքերը: Ես դրանք գրել եմ, որ մարդիկ կարդան:

ՆՈՒՆԵ ԶԱՔԱՐՅԱՆ