Երիտասարդական նոր շունչ՝ «Արտավազդ» մրցանակաբաշխությունում

Մեկնարկել է «Արտավազդ» թատերական 21-րդ մրցանակաբաշխության անվանակարգերում հայտագրված թատրոնների ներկայացումների դիտումները՝ ժյուրիի համար: Այս տարի «Արտավազդ» մրցանակի համար կպայքարեն նաեւ հայաստանյան թատերական կյանքում նոր անուններ:

Առաջին անգամ «Արտավազդ» թատերական մրցանակաբաշխության տարբեր անվանակարգերում առաջադրվելու համար հայտ է ներկայացրել նաեւ Երեւանի Շառլ Ազնավուրի անվան մշակույթի եւ արվեստի պետական քոլեջի «Ուսանողական թատրոնը»: Ժյուրիի դատին հանձնվեց Համլետ Թադեւոսյանի բեմադրությամբ՝ «Կիլիկիո արքա» եւ Ասյա Սեյրանյանի բեմադրությամբ՝ «Հայը» ներկայացումները:

Հանդիսատեսը իր գնահատականը տվեց ներկայացումներին հոտընկայս ծափահարություններով, իսկ թե ինչ գնահատական կտա ժյուրին, որոնցից միայն բացակայում էր ՀՀ արվեստի վաստակավոր գործիչ, կինոգետ, պրոֆեսոր Դավիթ Մուրադյանն՝ առողջական խնդիրներով պայմանավորված, թերեւս պարզ կլինի միայն թատերական գործիչների ամենասպասված «Արտավազդ» մրցանակաբաշխության ժամանակ:

«Իրավունքի» հետ զրույցում «Ուսանողական թատրոնի» ղեկավար, բեմադրիչ ՀԱՄԼԵՏ ԹԱԴԵՎՈՍՅԱՆՆ ասաց, որ թատրոնի երկու ներկայացումներով առաջադրվել են «Լավագույն երիտասարդ դերասան», «Լավագույն երիտասարդ դերասանուհի», «Լավագույն տղամարդ դերակատար», «Լավագույն ռեժիսուրա», «Երկրորդ պլանի լավագույն տղամարդ դերակատար», «Երկրորդ պլանի լավագույն կին դերակատար», «Լավագույն հնչյունային ձեւավորում», «Լավագույն երիտասարդ բեմադրիչ», «Լավագույն երիտասարդական ներկայացում» անվանակարգերում:

- Պարոն Թադեւոսյան, «Ուսանողական թատրոնն» ի՞նչ ակնկալիքներ ունի  «Արտավազդ» մրցանակաբաշխությունից:

- Ճիշտն ասած, ակնկալիքները մեծ են, որովհետեւ երկու ներկայացումներն էլ, իսկապես, կայացել են: «Կիլիկիո արքան» ես եմ բեմադրել, իսկ մյուս ներկայացումը՝ «Հայը», Ասյա Սերյանյանը, որը երաժշտական բավական հետաքրքիր բեմադրություն է՝ ներկայացնելով քրիստոնեության սկզբից մինչեւ մեր օրերը: Եթե նայել եք երկու ներկայացումն էլ, ապա կարող եք համեմատել եւ տեսնել, որ գլխավոր դերակատարները 180 աստիճանով փոխվում են՝ յուրաքանչյուր ներկայացման ժամանակ: Բոլորովին տարբերվում են՝ իրենց խաղով ու կերպարներով: Ես տարիներ շարունակ հետեւում եմ «Արտավազ» մրցանակաբաշխությանը եւ կարծում եմ՝ ըստ արժանվույն ենք ներկայացել, որովհետեւ որակ ենք ստացել մեր երիտասարդներից: Չեմ կարծում, թե խազ անգամ ներքեւ ենք մյուս թատրոններից՝ այն դեպքում, երբ մեր դերասանները դեռ ինստիտուտ չեն ավարտել եւ թատրոնի շունչը չեն զգացել: Այսօր մեր երիտասարդների մեջ կարողանում ենք նաեւ այս կերպ ձեւավորել հայրենասիրություն, կրթություն, սեր դեպի թատրոնը եւ գրականությունը:

- Տպավորություն էր, որ բեմում բազմամյա փորձ ունեցող պրոֆեսիոնալներ էին խաղում: Որքա՞ն ժամանակում է հաջողվել հասնել նման արդյունքի:

- «Կիլիկիո արքա»-յի դեպքում՝ ոչ այնքան բեմադրական հարցերի, որքան լեզվի վրա եմ երկար աշխատել: Դպրոցից այսօր գալիս են բավականին  ոտաբոբիկ արեւմտահայերենից եւ լեզվի վրա, իրոք, շատ աշխատանք ենք կատարել: Մոտ 3-4 ամիս միայն լեզվի վրա ենք աշխատել, որպեսզի յուրաքանչյուր բառը, յուրաքանչյուր հնչյունը ճշգրիտ հնչի արեւմտահայերենով: Դուք ինքներդ դիտել եք ներկայացումը եւ կփաստեք, որ կարողացել ենք բեմական խոսքին որակ տալ: Ոլորտի մասնագետներն էլ են ասում, որ ամեն ինչ լսելի էր ու հասկանալի, իսկ այսօրվա դերասանի համար հատկապես շատ կարեւոր է, որ իրեն կարողանան լսել եւ հասկանալ:

Նշենք, որ «Արտավազդ» թատերական մրցանակաբաշխությունը տարբեր տարիներին աչքի է ընկել՝ խրախուսելով երիտասարդական նոր շունչը հայաստանյան թատերական կյանքում: Օրինակ, 2016 թվականին ժյուրիի հատուկ որոշմամբ՝ «Տարվա դեբյուտ» անվանակարգում մրցանակի է արժանացել ԵԹԿՊԻ Գյումրու մասնաճյուղի ուսումնական թատրոնը՝  «Ֆանդո եւ Լիս» ներկայացմամբ, իսկ 2018 թվականին ՀԹԳՄ Արտավազդ-Դեբյուտ (դիպլոմ) եւ խրախուսական մրցանակի է արժանացել ԵԹԿՊԻ «Ուսումնական թատրոն»-ի «Շեքսպիրյան կրքեր»-ը:

ՀՐԱՆՏ ՍԱՐԱՖՅԱՆ

Այս թեմայով Մայիս ամիսը մեր պատմության մեջ եղել ու մնում է մեր փառահեղ հաղթանակների վկան Ով էր Փաշինյանին հունից հանած արցախցի կինը Վտանգավոր է նախկին ռևանշիստների վերընտրությունը, անթույլատրելի է այսօրվա քաղաքական իշխանության վերընտրությունը Երբ հայը զգում է, որ իր ցավը դարձել է քաղաքական հաշվարկի մաս, նրա և պետության միջև վստահությունը սկսում է նվազել Ժող. բաստիոնի ՍՊԵՑՆԱԶԸ ՍՓԱԱՅՍՆԱԶ Ա՞….չեմ հասկանում .նենց էիք «զախվատ» արել մարդուն, ոնց որ տեռորիստ բռնած լինեիք