Տեսաուղերձի առանցքայինը մեսիջը այն էր, որ նախագահը մեկ անգամ եւս փաստեց` Արցախը պայքարելու է, որ բացառված է Արցախի Ադրբեջանի կազմում լինելու հեռանկարը

Արցախի նախագահ Արայիկ Հարությունյանն ընդունել է Արցախի տարբեր շրջանների ներկայացուցիչներից կազմված՝ նախագահին կից խորհրդատվական մարմին ստեղծելու պահանջ-առաջարկը։ Այն պետք է ծառայի որպես երկրի ներքին ու արտաքին քաղաքականությանն առնչվող հարցերի քննարկման հարթակ, ունենա խորհրդատվության, առաջարկություններ ներկայացնելու առանցքային ու ծանրակշիռ իրավունք, հայտարարել է Արցախի ղեկավարը։ «Պատրաստ եմ առաջիկայում սկսել այդ գաղափարի իրացման աշխատանքները», - նշել է Արայիկ Հարությունյանը:

Վերը նշված մարմնի արդյունավետության եւ հիմնական գործառույթների, եւ առհասարակ ԱՀ նախագահի տեսաուղերձի մեջ գտած հիմնական մեսիջների շուրջ զրուցել ենք արցախցի ընդդիմադիր ակտիվիստ, «Իմ իրավունքը» շարժման համահիմնադիր Արթուր Օսիպյանի հետ, ով նախ առանձնացրեց ԱՀ նախագահի հիմնական երկու առանցքային մեսիջները.

-Ընդհանուր առմամբ դրական էին հիմնական մեսիջները, բայց չեմ ուզում տպավորություն ստեղծվի, որ ես դարձել եմ իշխանական: Ես եղել ու մնալու եմ որպես ընդդիմություն եւ հակակշիռ իշխանություններին, բայց եւ այնպես գտնում եմ, որ Արցախի նախագահի տեսաուղերձում տեղ գտած  մեսիջներից ամենաառնցքայինը այն էր, որ նախագահը մեկ անգամ եւս փաստեց, որ Արցախի ժողովուրդը պայքարելու է իր իրավունքների համար եւ, որ բացառված է Արցախի Ադրբեջանի կազմում լինելու հեռանկարը: Երկրորդ կարեւոր խնդիրը նա էր, որ նախինում անհնար էր միասնականության մասին խոսելը, իսկ այսօր նախագահը քայլ առաջ արեց  բալանսավորելու Արցախի ներքաղաքական դաշտը: 

Անդրադառնալով խորհրդատվական մարմին ստեղծելու կարեւորությանը եւ գործնական նշանակությանը մեր զրուցակիցը նկատեց.

-Նախ եկեք փաստենք, որ խորհրդատվական մարմին ստեղծելու առաջարկ արած նախաձեռնող խումբը, որը ղեկավարում Տիգրան Պետրոսյանը, ունի բավականին մեծ էլեկտորատ, որը ի վիճակի ցանկացած հարցում իր առանցքային դերը ստանձնել եւ լինել որոշիչ ամենատարբեր հարցերում: Սա կծառայի որպես եւս մեկ «ռիչակ» իշխանություններին զսպելու հակաժողովրդական, անօրինական քայլ կատարելուց, այլ կերպ ասած նախաձեռնությունը զսպաշապիկ կլինի իշխանությունների համար, մենք վստահ ենք, որ սա կզսպի իշխանություններին որոշակի կարմիր գծեր հատելու գործում:

Ի դեպ, մեր զրուցակցի խոսքով.

-Ընդ որում հանուն արդարության ասեմ, որ նման մարմին վաղուց ուզում էր ստեղծել հենց Արայիկ Հարությունյանը, պարզապես նա այնքան շատ է խառնել ողջ քաղաքական դաշտը, որ վստահություն չկար նրա որեւէ նախաձեռնության մեջ: Բայց, որ նման խորհդատվական մարմինը վաղուց էր ուզում ստեղծել, դա փաստ է:

ԻԼՈՆԱ ԱԶԱՐՅԱՆ