Նոր մանրամասներ Սաֆարովի կողմից կացնահարված հայ սպայի գործով․ Փաստաբանը մանրամասներ է ներկայացնում

Դեռեւս 2020թ․-ին ՄԻԵԴ-ը հրապարակեց Գուրգեն Մարգարյանի գործով վճիռը։ Մարդու իրավունքների եվրոպական դատարանը կայացրած վճռով արձանագրել է, որ Ադրբեջանը խախտել է կոնվենցիայի 2-րդ հոդվածը (կյանքի իրավունք), ինչպես նաև՝ 14-րդ հոդվածը (խտրականության արգելք)։

Վճռում նշված է նաև, որ Ադրբեջանը չհիմնավորված կերպով ձախողել է իր սպայի՝ էթնիկ ատելության հողի վրա իրականացրած հանցանքի համար ազատազրկման ապահովումը,  երկիր վերադառնալուց հետո ներել են  ու ապահովել նրա առաջխաղացումը։ Ադրբեջանը չի կարողացել հերքել խտրականության վերաբերյալ ենթադրյալ պնդումները։

ՄԻԵԴ վճռից երկու տարի անց կատարվել է արդյոք միջազգային դատարանի վճռով նախատեսված գործառույթները հարցի պատասխանը <<Իրավունքը>> փորձել է ստանալ Գուրգեն Մարգարյանի ընտանիքի շահերի ներկայացուցիչ, փաստաբան Նազելի Վարդանյանից, ով նախ ֆիքսեց, թե ինչ էր փաստվել ՄԻԵԴ վճռով․

-ՄԻԵԴ վճռում մասնավորապես նշված է․ «Փաստերը անխուսափելիորեն հանգեցնում են այն եզրակացության, որ Ադրբեջանը խախտել է Մարդու իրավունքների եվրոպական կոնվենցիայի 2-րդ հոդվածը (կյանքի իրավունք), ինչպես նաև՝ Հունգարիայի կողմից եղել է ՄԻԵԿ 2-րդ հոդվածի խախտում՝ ընթացակարգային ասպեկտում:

Հաշվի առնելով սույն գործով հարուցված իրավական հարցերի ծայրահեղ կարևոր բնույթը, «ծայրահեղ դաժան ատելության հանցագործությանը» ներում շնորհելը և դրանում ներառված մարդկանց, մասնավորապես՝ Հունգարիայի վարչապետին և պաշտպանության նախարարին, և Անդրբեջանի նախագահին, պաշտպանության նախարարին և արդարադատության նախարարին, և հաշվի առնելով, որ գործը «բարձրացնում է Կոնվենցիայի պահպանման վրա ազդող ընդհանուր բնույթի հարցեր», ես միայն կարող եմ ակնկալել, որ այս ողբերգական դեպքը կներկայացվի Մեծ պալատ քննարկումներին: Հույս ունեմ՝ մի օր հայցվորները կարժանանան լիարժեք արդարության:

Վճռին պետք է հաջորդեր ՀՀ կառավարության դիմումը Եվրոպայի նախարարների կոմիտե՝ վճռի կատարման պահանջով, առանց դիմում նախարարների կոմիտեն ոչինչ չի անում։ Նախարարների կոմիտեն դա նույնն է ինչ մեզ մոտ ԴԱՀԿ-ն։ Պետք ՀՀ Կառավարությունը հետամուտ լիներ, քանի որ ՀՀ-ն հանդիսանում է երրորդ կողմ, բայց մինչ օրս, չգիտես ինչու դեռ Եվրոպայի նախարարների կոմիտե դիմում չի հասցեագրվել։ Փաստորեն ունենք շատ հզոր ՄԻԵԴ վճիռը, որը մնացել է անկատար։

ՄԻԵԴ վճռի կատարման դեպքում Սաֆարովի կրկին պետք է հետ վերադարձվի, հակառակ դեպքում նրա նկատմամբ միջազգային հետախուզում կիրականացվի, սանկցիաներ կիրառվեն եւ այլն, բայց, փաստորեն մինչ այժմ ոչինչ չի արվում։ Մենք մեր կողմից այլեւս այստեղ անելիք, ցավոք, չունենք, հիմա գնդակը, այսպես ասած, Կառավարության դաշտում է։ Մենք հասել ենք շատ կարեւոր, կրկնում եմ հզոր վճռի, մնացածը պետք է ՀՀ-ն հետամուտ լինի։

ԻԼՈՆԱ ԱԶԱՐՅԱՆ