Թուրքիայի հայերը կզորակցեն ընդդիմության նոր թեկնածուին և ոչ Էրդողանին․Ավերված Թուրքիան պատրաստվում է ընտրությունների

Թուրքիայի ընդդիմադիր գործիչները, նախագահի թեկնածուները հակահայկական դիրքորոշում ունեն ու տարիներ շարունակ վարել են հակահայկական քաղաքականություն այս մասին <<Իրավունքի>> հետ զրույցում անդրադառնալով Թուրքիայում սպասվող ընտրություններին եւ թեկնածուների դիրքորոշումներին, ասաց Ստամբուլում լույս տեսնող «Ակօս» շաբաթաթերթի հայերեն էջերի խմբագիր Բագրատ Էստուկյանը, ընդգծելով․

-Ես բազմիցս ասել եմ, որ հայկական հարցերի շուրջ մեծ փոփոխություններ սպասել պետք չէ՝ անգամ եթե Էրդողանն այդ ընտրություններում պարտություն կրի։ Թուրքիայի բոլոր քաղաքական գործիչները նույն մարտավարություն ունեն։ Այստեղ բացառություն է կազմում միայն  Քրդամետ դեմոկրատական կուսակցությունը։ Մնացած բոլորը նույն ուղղությունն ունեն, զարմանալու բան չկա, բոլորն էլ հակահայ են։ Ասեմ նաեև, որ Թուրքիայում անցկացված բազմաթիվ սոցիալական հարցումները վկայում են, որ ընդդիմության թեկնածուն բավականին բարձր շանսեր ունի։ Ավելին ասեմ, հավանաբար Թուրքիայի հայերը մեծ մասամբ կզորակցեն ընդդիմության նոր թեկնածուին և ոչ Էրդողանին, որովհետև նա մի քիչ ավելի ժողովրդավարական է, Էրդողանի կառավարությունն իսկական  բռնապետություն  է դարձել։

-Պարոն Էստուկյան, հնարավո՞ր է ընտրություններից հետո գործընթացը կանգ առնի, արդեն իսկ ձեռք բերված պայմանավորվածությունները չեղարկվեն և դադարեն հայ և թուրք բանագնացների հանդիպումները։

-Ո՛չ, ես այդ հարցում մեծ փոփոխություն չեմ ակնկալում։ Ինչպես կար գործընթացը, այդպես էլ կշարունակվի։

ԻԼՈՆԱ ԱԶԱՐՅԱՆ