Շուշիի շրջակայքում տեղի ունեցածը ապացուցեց, որ Ադրբեջանը ունի մեկ նպատակ` ինչպես միջնադարյան մի սուլթանանտ, ճորտացնել արցախահայությանը. ԱՀ ԱԺ պատգամավոր

Ադրբեջանական կողմը վերջին օրերին ավելի է ակտիվացրել գործողությունները, որոնցով խոչընդոտում է քաղաքացիների՝ Արցախ մուտք գործելը։ Ինչի՞ հետևանք է սա, ու կոնկրետ Արցախի իշխանությունն ի՞նչ է անում այս իրավիճակը շտկելու համար, հարցի պատասխանը փորձել ենք ստանալ Արցախի Ազգային ժողովի անկախ պատգամավոր Կարեն Հովհաննիսյանից, ով փաստեց.

-Իսկապես վերջին դեպքը, որը տեղի ունեցավ Շուշի քաղաքի շրջակայքում Հայաստանից Արցախ վերադարձող մեր քաղաքացիների հետ, ովքեր վերադառնում էին ռուսական խաղաղապահ զորակազմի ուղեկցությամբ, իրենց իսկ զինվորական մեքենաներով, ցույց տվեց այն, որ ադրբեջանական հայատյաց քաղաքականությունը մեկ միլիմետրի շեղում չունի դեպի բարիդրացիական հարաբերություններ, և սին հույսեր փայփայելը կարող է մեզ համար ճակատագրական լինել։ Ուղղակի այդ պետության քաղաքական իշխանությունները ունեն մեկ նպատակ, ինչպես միջնադարյան մի սուլթանանտ, ճորտացնել արցախահայությանը և իրենց ներքին վախերին բավարարում տալ։