«ՇԱՏ ՈՒՐԱԽԱՑԱ, ՀԱՏԿԱՊԵՍ ԹՈՒՐՔ ՄԱՐԶԻԿԻՆ ՀԱՂԹԵԼՈՒՑ ՀԵՏՈ» ԸՄԲՇԱՄԱՐՏԻԿ ԳԱՍՊԱՐ ՏԵՐՏԵՐՅԱՆ

Վերջերս Երևանում կայացել է հունահռոմեական ոճի ըմբշամարտի երիտասարդների Հայաստանի առաջնությունը, որի ժամանակ Էջմիածնի մարզադպրոցի սաները գրանցել են մեծ հաջողություններ։ 60 կգ քաշային կարգում ՍՈՒՐԵՆ ԱՂԱՋԱՆՅԱՆԸ նվաճել է առաջնության ոսկե մեդալը, ՍԱՄՎԵԼ ԽԱՉԱՏՐՅԱՆԸ 82 կգ քաշային կարգում նվաճել է արծաթե մեդալ, 60 կգ քաշային կարգում ԳԱՌՆԻԿ ԲԱՐՍԵՂՅԱՆԸ և 97 կգ ՆՎԵՐ ՀԱՄԲԱՐՁՈՒՄՅԱՆԸ բրոնզե մեդալ են նվաճել, 67 կգ քաշային կարգում ԳԱՍՊԱՐ ՏԵՐՏԵՐՅԱՆԸ ոսկե մեդալ է նվաճել, իսկ ՀԱՅԿ ԼՅՈՒԴՎԻԳՅԱՆԸ 63 կգ քաշային կարգում բրոնզե մեդալ է նվաճել, 72 կգ ՌՈԼԱՆԴ ԻԳԻԹՅԱՆԸ բրոնզե մեդալակիր է դարձել։

Iravunk. com -ի հետ զրույցում Հայաստանի, Եվրոպայի չեմպիոն, Աշխարհի փոխչեմպիոն, միջազգային կարգի սպորտի վարպետ ՍՈՒՐԵՆ ԱՂԱՋԱՆՅԱՆԸ նշեց.

«Հանդես եկա 60 կգ քաշային կարգում։ Երեք գոտեմարտ ունեցա։ Դժվար անցան առաջին և վերջին գոտեմարտերը։ Ծնկի վնասվածք ունեմ, վերջին գոտեմարտի ժամանակ վնասվածքս ավելի բարդացավ։ Մոտակա ժամանակները ոչ մի առաջնության չեմ կարող մասնակցել վիրահատություն պատճառով, միանգամից կմասնակցեմ Եվրոպայի առաջնությանը, որը կկայանա հունիսի 29-ից հուլիսի 2-ը։

Անցած տարի Բուլղարիայի մայրաքաղաք Սոֆիայում Աշխարհի երիտասարդական առաջնության ժամանակ փոխչեմպիոն եմ դարձել։ Սկզբից ղազախ մարզիկին հաղթեցի, քառորդ եզրափակչում, դիտարժան պայքարում 16-7 հաշվով կամային հաղթանակ տարա ազգությամբ թուրք մրցակցիս նկատմամբ, կիսաեզրափակչում տուշեով, այսինքն ժամանակից շուտ հաղթեցի Հնդկաստանի ներկայացուցչին, ափսոս, եզրափակչում պարտվեցի իրանցի մարզիկին» ։

Իսկ ծնունդով Էջմիածնի շրջանի Ակնաշեն գյուղից ԳԱՍՊԱՐ ՏԵՐՏԵՐՅԱՆԸ, ով Մ-17 տարեկանների Աշխարհի չեմպիոն է, ՀՀ սպորտի վարպետ, այսպես մեկնաբանեց.

- «Երեք գոտեմարտ ունեցա, ամենաբարդը եզրափակիչ գոտեմարտն էր։ Հանդես եմ գալիս 67 կգ քաշային կարգում, վիրահատության էլ եմ ենթարկվել, դեռ լիովին չեմ ապաքինվել» ։

- Գասպար, իսկ հիշարժան գոտեմարտ ունեցե՞լ ես: 

- Իհարկե, անցած տարի օգոստոսին Իտալիայի մայրաքաղաք Հռոմում ընթացող հունահռոմեական ոճի ըմբշամարտի Աշխարհի առաջնության ժամանակ շատ մեծ առավելությամբ 8։0 հաշվով հաղթեցի ազգությամբ թուրք մրցակցիս, կիսաեզրափակչում հաղթեցի իրանցի մարզիկին, եզրափակչում էլ հաղթեցի ֆրանսիացի մրցակցիս։ Շատ ուրախացա, հատկապես թուրք մարզիկին հաղթելուց հետո։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ