Հանրային հեռուստաընկերության տնօրենը, աշխատակիցը պետք է հրաժարական ներկայացնեն. Բալասանյան

«Հանրային հեռուստաընկերության տնօրենը, Կոմիտասին ձեռք առնող ախպարին (ախպարի ու հայրենադարձի մեջ կա հստակ տարբերություն. ախպարը իր Հայրենիքում փող աշխատող, բայց Հայրենիքից դուրս կյանքը վայելող տեսակն է) եթեր հրավիրող աշխատակիցը պետք է հրաժարական ներկայացնեն։ Մենք այս պահանջը ներկայացնելու իրավունք ունենք, քանի որ մեր հարկերից եք դուք վարձատրվում։ Հրապարակային ներողություն պիտի խնդրեք ու պարտավորվեք, որ այլեւս երբեք նման ոչ մի բաների չեք հրավիրելու։ Իսկ դու գնա մուղամ լսի այ....: Թե բա մուղամը մերն է: Շատ ափսոս, որ նույն ազգանունն ենք կրում», - գրել է ԵՊՀ միջազգային հարաբերությունների եւ դիվանագիտության ամբիոնի դոցենտ, միջազգայնագետ ԳՐԻԳՈՐ ԲԱԼԱՍԱՆՅԱՆԸ:

Հիշեցնենք, որ Հանրային հեռուստաընկերության «Կերպարից դուրս» հաղորդմանը հյուրընկալվել էր ամերիկաբնակ երգիչ, ռեփեր Սուպեր Սաքոն: Նա զրույցի ընթացքում խոսել է մուղամի հայկական լինելու մասին։

«Բայց ով ասեց, որ դա իրանց երաժշտությունն ա: Մուղամը մերն էլ ա եղել: Կոմիտասը եկել եւ մաքրել է, որովհետեւ, երբ հայկական երաժշտությունը մատուցել ա Եվրոպային, նրանք չեն հասկացել այդ ծռած նոտաները, իրանց տհաճ ա թվացել, իսկ ինքը` հայ երգը տարածելու համար, հետո եկել ու ջնջել էդ նոտաները։ Ես գիտեմ էդ պատմությունը եւ, պարզապես, տարածելու համար նա ջնջել ա էդ նոտաները, բայց ռաբիսը միշտ մերն ա եղել»,- ասել է Սուպեր Սաքոն: