«Թանգարաններ, կայունություն և բարեկեցություն»

Եղիշե Չարենցի անվան գրականության և արվեստի թանգարանը մեծ հանդիսավորությամբ պատրաստվում է սփյուռքահայ գորգանակրիչ, հողարվեստի ուղղության հետևորդ Մարկոս Գրիգորյանի 100-ամյակին։ Թանգարանի տնօրեն Վահագն Սարգսյանը նկատեց, որ օրը սիմվոլիկ է. «Այսօր թանգարանների միջազգային օրն է, որի խորագիրն է «Թանգարաններ, կայունություն և բարեկեցություն», և մենք այս համագործակցությամբ կայունություն ենք ստեղծում»։ Հոբելյանական նախաձեռնությունների շրջանակում՝ թանգարանների միջազգային օրը, գրականության և արվեստի թանգարանում տեղի ունեցավ փոխըմբռնման հուշագրերի կնքման հանդիսավոր արարողություն ԳԱԹ գործընկերների հետ։

Թանգարանի տնօրեն Վահագն Սարգսյանը հուշագրեր կնքեց «Թուֆենկյան գորգեր» ընկերության, ինչպես նաև Sibil La Reine ապրանքանիշը ներկայացնող պոլսահայ երգչուհի՝ Սիբիլ Բեքթորոսօղլու-ի հետ։ Թանգարանին և գործընկերներին միավորում է մեկ նպատակ, այն է՝ նյութականացնել Մարկոս Գրիգորյանի արվեստը։ Իր գորգանկարները «Թուֆենկյան» ընկերությունը պարբերաբար զրոյից էսքիզ են անում և նվիրում թանգարանին։ Թանգարանի տնօրեն Վահագն Սարգսյանը խոսեց համագործակցությունների կարևորության և ներուժի մասին։ Նրա կարծիքով այս ընկերության հետ համագործակցության նպատակն է մարդկանց սովորեցնել գորգագործություն և վերադարձնել իրենց արվեստը։ Ըստ տնօրենի խոսքերի մեծ հույսեր են կապում, որ ծրագիրը շուտով կտարածվի ամբողջ հանրապետությունում։ «Թուֆենկյան» ընկերությունը ստեղծում է գորգեր՝ տարածելով սեր ու հոգատարություն մարդկանց նկատմամբ: Յուրաքանչյուր կտոր ստեղծվում է գորգագործության հնագույն ավանդույթների համաձայն՝ բացառիկ հումքից:

Սիբիլ Բեքթորոսօղլուն իրեն համարում է թանգարանի լավագույն բարեկամ։ Նա Մարկոս Գրիգորյանի մոտիվներով բազմաթիվ զարդերի շարք է ներկայացրել հանրությանը։

Թանգարանի տնօրեն Վահագն Սարգսյանի խոսքով՝ «Սիբիլը երգչուհի է, ով ոչ միայն իր ձայնով կարող է հաղթանակներ բերել, այլ նաև արվեստով»:

Թանգարանը շարունակում է բաց մնալ համագործակցությունների համար՝ նպատակ ունենալով արվեստը սերմանել մարդկանց հոգում և այն տարածել Հայաստանի սահմաններում։

ՍՅՈՒԶԻ ԴԱՎԹՅԱՆ

ԼԻԼԻԹ ՄՈՒՐԱԴՅԱՆ