Արթուր Թովմասյանի եւ Արցախի նախագահ Արայիկ Հարությունյանի միջեւ չկա լարվածություն, չի՛ եղել ու չի՛ կարող լինել․ «Ազատ հայրենիք-ՔՄԴ» խմբակցության ղեկավարը փակագծեր է բացում

Արցախի Ազգային ժողովի նախագահ Արթուր Թովմասյանը խորհրդարանի մայիսի 18-ի նիստի ընթացքում Արցախի նախագահին  կոչ արեց ստեղծել պետական պաշտպանության կոմիտե․ «Եվ երկրի նախագահին առաջարկել եմ այդ կազմում (ընդգրկել – խմբ․) երկու մարդու՝ Ռուբեն Վարդանյանին և Սամվել Բաբայանին։ Պարոն նախագահ, եթե այդ մոդելը չաշխատեց, հրաժարականի դիմում ներկայացրեք կամ դրեք ձեր վստահության հանրաքվեն։ Եթե ժողովուրդը ձեզ չի վստահում, որ ընտրվել եք, ապա կհեռանաք»։

Վերը նշված հայտարարությունից հետո քաղաքական որոշ շրջանակներ վստահեցնում էին, որ ԱՀ ԱԺ  նախագահի եւ ԱՀ նախագահի միջեւ առկա հասունացել է լուրջ հակասություն, անգամ լուրեր տարածվեցին, որ ԱՀ ԱԺ նախագահը ճամբարափոխ է եղել եւ դավաճանել սեփական կուսակցությանը։ Տարածված լուրերը, սակայն, ինչպես  <<Իրավունքի>> հետ զրույցում վստահեցրեց  Արցախի Հանրապետության Ազգային ժողովի «Ազատ հայրենիք-ՔՄԴ» խմբակցության ղեկավար Արթուր Հարությունյանը, աղերս չունեն իրականությանը, իսկ իրականությունը հետեւյալն է․

-Ազգային ժողովի նախագահ Արթուր Թովմասյանի եւ Արցախի նախագահ Արայիկ Հարությունյանի միջեւ չկա լարվածություն, չի՛ եղել ու չի՛ կարող լինել։ Ազգային ժողովի նախագահի հայտարարությունը վերաբերում էր մայիսի 15-ին ԱՀ նախագահի կողմից հայտարարված քաղաքական կոնսուլտացիաներին՝ ստեղծված իրավիճակին եւ առկա մարտահրավերներին դիմակայելու համար։ Հենց այս համատեսքստում հնչեց պարոն Թովմասյանի առաջարկությունը, ըստ որի կամ պետք է ստեղծվի Պետական պաշտպանության կոմիտեի ձեւաչափով մարմնի, կամ անցկացնել վստահության հանրաքվե, որի արդյունքիներից ելնելով կայացնել հետագա որոշումները։ Որեւէ պահանջ չի եղել։

-Ըստ Ձեզ, որքանո՞վ է իրատեսական վստահության հանրաքվե անցկացնելու գործընթացը այս պահին, հաշվի առելով, որ թշնամին օր-օրի սեղմում է Արցախի շուրջ օղակը։

-Վստահության հանրաքվեն նպատակ ունի մեղմել, կայունացնել ստեղծված քաղաքական իրավիճակը։ Վստահության հանրաքվե անցկացնելու հնարավորությունը մեզ տալիս Արցախի Սահմանադրությունը։ Բայց այս պահին քաղաքական որոշում դեռ չկա, քաղաքական կոնսուլտացիաները շարունակվում են։ Հենց լինի նման որոշում Արցախի հանրապետության նախագահը այդ մասին ինքը հանդես կգա հայտարարությամբ։

ԻԼՈՆԱ ԱԶԱՐՅԱՆ