Այս առաքելությամբ մեծ օգուտ կբերեմ իմ ազգին ու պետությանը և իմ ծառայությունն այսպես կմատուցեմ իմ հայրենիքին. Էրիկ Իսրայելյան

Բռնցքամարտի աշխարհի ու Եվրոպայի երիտասարդական չեմպիոն Էրիկ Իսրայելյանը, որը հրաժարվել էր ելույթները շարունակել Հայաստանի դրոշի ներքո, հայտարարել է, որ չեղարկել է պրոֆեսիոնալ բռնցքամարտի Eye of the Tiger Management պրոմոութերական ընկերության հետ կնքած պայմանագիրը:

«ՀՀ ԿԳՄՍ նախարարությունը հանրային քննարկման է ներկայացրել իմ տարկետումը դադարեցնելու մասին նախագիծը, որը ստացել էի սպորտի բնագավառում ունեցած նշանակալի նվաճումների համար, նաև ՀՀ կառավարության 2022 թվականի դեկտեմբերի 29-Ի № 2062 -Ա որոշման մեջ փոփոխություն կատարելու մասին նախագիծը:

Նշում են, որ տարկետումը դադարեցվում է՝ ՀՀ բռնցքամարտի հավաքական թիմի կազմում ընդգրկված չլինելու հիմքով: Ս.թ. փետրվարի 4-ին կայացել է բռնցքամարտի Հայաստանի առաջնությունը: Ես չեմ մասնակցել նշված առաջնությանը՝ լուրջ վնասվածքի պատճառով, որի մասին նախապես տեղեկացրել եմ ՀՀ ԿԳՄՍ փոխնախարար Կարեն Գիլոյանին, իսկ իմ անձնական մարզիչ Արմեն Հակոբյանը վնասվածքիս մասին տեղեկացրել է հավաքականի գլխավոր մարզիչ Կարեն Աղամալյանին: Բերված պատճառաբանությունը չի կարող հիմք հանդիսանալ ինձ տարկետումից զրկելու համար, քանի որ մրցաշարին չմասնակցելու պատճառը հարգելի է:

Նշվում է նաև, որ ես պայմանագիր եմ կնքել պրոֆեսիոնալ բռնցքամարտի Eye of the Tiger Management պրոմոութերական ընկերության հետ ու տեղափոխվելու եմ Կանադա: Ասեմ, որ չեղարկել եմ վերոնշյալ պայմանագիրը և հունիսի 1-ին կայանալիք մրցումների մասնակցությունը: Ինձ համար աշխարհի տարբեր երկրներում, տարբեր հարթակներից հայոց եռագույնը բարձրացնելն ու օրհներգը հնչեցնելը մեծագույն պատիվ է և այս առաքելությամբ մեծ օգուտ կբերեմ իմ ազգին ու պետությանը և իմ ծառայությունն այսպես կմատուցեմ իմ հայրենիքին»,- գրել է մարզիկը սոցցանցերում: