Արսենյանի դավաճան գլխին ինչ հասնի, կարող է ասել. Արցախյան շարժման ակտիվիստը` ՔՊ-ական պատգամավորի արցախահայերին Բեյրութի հայերի հետ հավասարեցնելու մասին

Արցախահայերի կարգավիճակը Գլենդելում ապրող հայության կարգավիճակի հետ է  համեմատել իշխանական պատգամավոր Գուրգեն Արսենյանը: Լրագրողների հետ ճեպազրույցում պատգամավորը շեշտել է՝ Հայաստանի պետական պաշտոնյաների գլխավոր խնդիրը Հայաստանի Հանրապետության քաղաքացիների շահերի սպասարկումն է, ոչ թե այն հայերի, որ ապրում են Արցախում, Բեյրութում, Ավստրալիայում: Վերը նշվածի շուրջ մեկնաբանություն խնդրեցինք Արցախյան շարժման ակտիվիստ, հասարակական-քաղաքական գործիչ Բորիս Առուշանյանից, ով նկատեց.

-Արսենյանի դավաճան գլխին ինչ հասնի, կարող է ասել. Գոյություն ունի միջազգային իրավունք, եղել է ԽՍՀՄ սահմանադրություն և օրենքներ, որոնց համաձայն Արցախի ժողովուրդն իրացրել է իր ինքնորոշման իրավունքը։ Այսօր հարցը դիտարկվում է քաղաքական հարթությունում, որտեղ հայկական կողմի դիրքերը թույլ են, քանի որ 30 տարի և հատկապես վերջին տարիներին ՀՀ ղեկավարները վարում են արտաքին շահեր սպասարկող քաղաքականություն։

Հայաստանի ղեկավարությունը թյուրիմացաբար կարծում է, որ լքելով Արցախը կկարողանա դուրս գալ թուրքերի ճնշումից և ապահովել Հայաստանի Հանրապետության զարգացումը։ Նրանք լավ չեն ճանաչում մեր թշնամուն և նրա ռազմավարությունը: Նրանց զինանոցում ազդեցության բազմաթիվ գործիքներ կան, և միշտ կա պատճառ։ Կարծում եմ, որ ամենայն հավանականությամբ Փաշինյանն ու թիմը պարզապես երկարացնում են իշխանության մնալը (նրանք այնքան էլ հիմար չեն, որ չտեսնեն ակնհայտը)։ Ինձ վրդովեցնում է, որ Հայաստանում, ցավոք, Արսենյանի նմանները շատ են։ Իրենց ժամանակին դաստիարակել են ԼՏՊ-ն ու ՀՀՇ-ն, այսօր սնվում են արտաքին ուժերից։ Մի խոսքով, սա դավաճանություն է ոչ միայն Արցախի ժողովրդի, այլեւ Հայաստանի նկատմամբ։