Անտարբերությունը սպանում է սերը. ՇՊՌՈՏ

Վերջերս հայրենիքում էր երգչուհի ՇՊՌՈՏԸ: «Իրավունքի» հետ զրույցում նա ասաց, որ ամեն անգամ իր համար տոն է հայրենիք վերադառնալը, եւ երբ գալիս է, չի ուզում գնալ:

— Ի՞նչ տպավորություններ ստացաք այս անգամվա այցից:

— Ընտանիքիս հետ շատ լավ ժամանակ անցկացրի: Երբ հարազատներիս մոտ եմ լինում, ուղղակի, ուզում եմ մնալ տանը եւ վայելել նրանց ներկայությունն ու քաղցրությունը, վայելել մամայիս պատրաստած համեղ կերակուրները ու զբոսնել: Դա այն է, ինչ ինձ պակասում է ԱՄՆ-ում: Ինձ համար ամեն օրը տպավորիչ էր: Մայրիկիս, քրոջս եւ քրոջս դուստրերի հետ գիշերները խաղեր էինք խաղում: Հայկական արտադրանքի շատ հետաքրքիր խաղեր են հայտնվել, որ ինձ համար հաճելի անակնկալ էր: Ուղղակի երեխայի պես հասարակ բաների համար շատ էի ուրախանում:

— Հայ տղամարդկանց մասին արված Ձեր խիստ արտահայտությունից չէի՞ն նեղացել հայրենիքում:

— Իհարկե, նեղացան… Իրականում ես սիրում եմ հայ տղամարդկանց, մանավանդ` երբ որակ եմ նկատում: Ուղղակի հայ կանանցից հազարավոր նամակներ եմ ստանում, ովքեր չունեն հնարավորություն բարձրաձայնելու կին-տղամարդ հարաբերության խնդիրների մասին: Լռելը սխալ է: Եվ ես իմ կյանքի փորձից ու սխալներից կիսվում եմ նրանց հետ: Մենք, իհարկե, ունենք հիասքանչ տղամարդիկ, ովքեր այսօր սահման են պահում, ովքեր վերադարձել են պատերազմից եւ փորձում են շարունակել ապրել: Ես ուղղակի չեմ սիրում անհավասարություն: Գիտակցում եմ, որ շատ անգամ կոպիտ եմ խոսում, բայց խնդրի վրա լույս վառելու միակ միջոցը կոպիտ խոսելն է: Ես իդեալական չեմ եւ ունեմ շատ սխալներ: Ուղղակի ուզում եմ, որ իմ ժողովուրդն անտարբեր չլինի ընտանեկան խնդիրների հանդեպ: Կարծում եմ` մի ծաղկով գարուն չի գա: Այսօր մենք կարիք ունենք փոխվելու, եւ ես պետք է սկսեմ ինձնից: Այն տղամարդիկ, ովքեր հավատարիմ եւ հայրենասեր են, թող իրենց վրա չվերցնեն իմ ասած խոսքերը: Ես երբեք չեմ ուզեցել նեղացնել նրանց: Բայց մի այսպիսի խոսք կա` ճիշտ խոսացողի գլուխը միշտ ծակ է:

— Դուք հավատո՞ւմ եք անդավաճան սիրո գաղափարին:

— Ես հավատում եմ, որ միայն Աստծո շնորհիվ հնարավոր է սիրել եւ այդ սերը մաքուր պահել: Դժվարություններ միշտ էլ կլինեն, բայց անտարբերությունը սպանում է սերը:

— Ինչպիսի՞ ընտանիք կցանկանայիք կազմել:

— Շատ կուզենայի ունենալ Առաքելական եկեղեցուն հետեւող եւ ազգային արժեքներ ունեցող ընտանիք:

— Ի՞նչը կարող է Ձեզ երջանկացնել:

— Չնայած փոքր բաներից էլ երջանկանում եմ, բայց, իհարկե, ինձ շատ կերջանկացնի ընտանիքը եւ երեխան:

— Հայկական ավանդական կարծրատիպերից ո՞րը չեք ընդունում:

— Այսօր ես շատ հարգում եմ ընտանիքի գաղափարը, բայց եթե կա անհավասարություն, չեմ ընդունում: Ընդունում եմ, որ ընտանիքում տղամարդը գլուխն է, իսկ կինը` սիրտը: Սակայն դա չի նշանակում, որ հայ տղամարդը կնոջը դավաճանելիս պետք է գլուխ գովի, բայց նաեւ կինն էլ պետք է լինի կանացի ու սովորի լռել, երբ վիճակը թեժ է:

ՆՈՒՆԵ ԶԱՔԱՐՅԱՆ

Այս թեմայով Մեր վեհափառին թիրախավորում են, քահանաներին` բանտարկում` հայրենասիրության պատճառով. Շպռոտ Շպռոտն ամերիկյան կյանքի, ամուսնու, ընտանեկան արժեքների ու Հայաստանի կարոտի մասին  Մի բան էն չի էս տեսարանի մեջ․ Շպռոտ Այս գլխարկով սևամորթ կանայք թաղում են գնում. Շպռոտ Այս իշխանությունները պարզապես խամաճիկներ են եւ կատարողներ. Անի Թովմասյանի (Շպռոտ)