Թատրոնի տնօրենի մրցույթը չհայտարարված՝ արդեն կա հաղթո՞ղ. Արծրուն Չոբանյանը փակագծեր է բացում

Մշակութային 15 Օգոստոս, 2023 14:13

Այս տարվա հուլիս ամսին, համաձայն Երեւանի քաղաքապետարանի որոշման, կրճատվեցին «Մհեր Մկրտչյան» արտիստական թատրոնի գեղարվեստական ղեկավարի, ռեժիսորի օգնականի, բեմադրական մասի վարիչի, նկարչի հաստիքները: Հիմա էլ լուրեր են շրջանառվում, որ թատրոնի տնօրեն են պատրաստվում նշանակել դերասան Սոս Ջանիբեկյանին: Սակայն այդ որոշմանը դեմ է «Մհեր Մկրտչյան» արտիստական թատրոնի դերասան Արծրուն Չոբանյանը, ով նաեւ իր թեկնածությունն է առաջարկում տնօրենի հաստիքի համար: Հիշեցնենք, որ ներկա պահին թատրնի տնօրենի ժամանակավոր պաշտոնակատարն է Մակիչ Մարգարյանը: Այս մասին «Իրավունքը» զրուցել է ԱՐԾՐՈՒՆ ՉՈԲԱՆՅԱՆԻ հետ:

— Դուք, լսելով շրջանառվող լուրերը, որ «Մհեր Մկրտչյան» արտիստական թատրոնի տնօրենի պաշտոն են պատրաստվում նշանակել Սոս Ջանիբեկյանին՝ բողոքի ձայն բարձրացրիք եւ առաջարկեցիք Ձեր թեկնածությունը: Ո՞րն էր պատճառը նման որոշման:

— Ես ցանկություն ունեմ մասնակցելու «Մհեր Մկրտչյան» արտիստական թատրոնի տնօրենի պաշտոնի համար մրցույթին, եւ ինձ համար խնդիրն այն է, որ դեռ մրցույթը չհայտարարված, արդեն ունի հաղթող:

— Որքանո՞վ եք վստահ, որ Սոս Ջանիբեկյանն է ընտրված թեկնածուն:

— Երբ Սոսին լրագրողները հարցրել են այդ մասին, նա ասել է՝ քննարկման փուլում են, բանակցությունների մեջ են: Եվ հետո, երբ հստակ չի, ու արդեն բանակցությունների փուլում են, Սոսը գալիս-գնում է թատրոն, դա արդեն իսկ ամեն ինչ ասում է:

— Ըստ Ձեզ՝ նախկին տնօրենն ինչո՞ւ հանկարծ որոշեց հեռանալ թատրոնից:

— Չգիտեմ, ես այդ թեմայով չեմ խոսել նրա հետ: Այդ հարցն իրեն ուղղեք:

— Դուք որքա՞ն ժամանակ է, որ աշխատում եք «Մհեր Մկրտչյան» արտիստական թատրոնում:

— 2016 թվականից աշխատում եմ: Ունեցել եմ տարբեր դերեր: Խաղացել եմ ե՛ւ գլխավոր, ե՛ւ երկրորդական, ե՛ւ էպիզոդիկ դերեր: Ի վերջո, դերասանի համար կարեւորը խաղն է: Եթե այդ դերը տալիս են, ուրեմն՝ պետք է խաղաս: Ռեժիսոր-դերասան հարաբերությունների մեջ շատ խելոք եմ: Եթե ինձ դուր է գալիս ռեժիսորի միտքը, համաձայնվում եմ, իսկ եթե ոչ՝ մերժում: Այդ առումով ոչ մի խնդիր չունեմ:

— Դեռեւս ամռանը կրճատվեց Մհեր Մկրտչյանի հաստիքը: Ի՞նչ կասեք այս մասին:

— Ես այդպես էլ չհասկացա պատճառը: Եթե խնդիրը Մհեր Մկրտչյանի քաղաքական հայացքները չէին, ապա ինչպե՞ս կարող ենք հասկանալ այն հանգամանքը, որ կրճատեցին գեղարվեստական ղեկավարի հաստիքը:

— Ի՞նչ եք կարծում՝ եթե Մհեր Մկրտչյանի հաստիքը կրճատեցին, ում հայրը, հորեղբայրը մեծ ներդրում են ունեցել այդ թատրոնում, ինչո՞ւ հիմա էլ նույն հաջողությամբ չեն կարող Սոս Ջանիբեկյանին նշանակել այդ թատրոնի տնօրեն:

— Իմ բոլոր քայլերը գնում է նրան, որ փորձեմ թատրոնում պահել այն մթնոլորտը, որը միշտ եղել է, եւ տեսել, զգացել ու հասկացել եմ:

— Ի՞նչ հիշողություններ ունեք լուսահոգի Ալբերտ Մկրտչյանի հետ կապված:

— Սկզբնական շրջանում, որ աշխատում էի թատրոնում, Ալբերտ Մկրտչյանն արդեն հիվանդ էր, բայց գալիս-գնում էր: Երբ Ալբերտ Մկրտչյանը թատրոն էր մտնում, բոլորի պատկառանքը, հարգանքը, վերաբերմունքը մեծ էր նրա նկատմամբ: Դա ուղղակի պետք էր զգալ: Ես դա չեմ կարող բառերով բացատրել:

— Տնօրենի պաշտոն զբաղեցնելու համար պետք է կարողանալ սառնասիրտ որոշումներ կայացնել: Դուք պատրա՞ստ եք այդ ամենին:

— Այո, պատրաստ եմ …

— Թատրոնի տնօրենի պաշտոնը զբաղեցնելուց հետո՝ ի՞նչ նորարարություններ եք պատրաստվում անել:

— Թատրոնը ներկա պահին գտնվում է վերանորոգման փուլում, եւ պարզ չէ, թե որքան կտեւի վերանորոգման ավարտը: Երբ ավարտվի, ու տեսնենք տեխնիկական հագեցվածության որակը, նոր կասեմ այդ մասին, քանի որ խնդիրներ կային ե՛ւ տեխնիկական, ե՛ւ ստեղծագործական առումով: Այդ ամենը պետք է մշակել ու որպես ծրագիր ներկայացնել տնօրենի մրցույթի համար:

— Այսօր, ըստ Ձեզ, թատրոնի հիմնական խնդիրը ո՞րն է:

— Վերանորոգումից առաջ տեխնիկական հագեցվածությունը ուրիշ էր, եւ այդ առումով կային խնդիրներ: Հիմա նոր տեխնիկա են դրել, որի մասին դեռ չգիտեմ, բայց առաջին հայացքից երեւում է, որ լավ տեխնիկա է: Միակ հստակ խնդիրը, որ կփորձեմ լուծել՝աշխատավարձի հարցն է: Այսօր թատրոնում շատ ցածր աշխատավարձ են ստանում:

— Ի՞նչ ճանապարհով եք լուծելու աշխատավարձի խնդիրը:

— Կփորձեմ ինչ-որ հովանավորչական միջոցներ գտնել, որպեսզի նրանց աջակցության շնորհիվ դրանց մի մասն ուղղվի թատրոնի աշխատողների աշխատավարձին, իսկ մյուս մասը՝ թատրոնի կարիքներին:

ՆՈՒՆԵ ԶԱՔԱՐՅԱՆ