Բացահայտում ենք Վան Եղիազարյանին. «Ստեղծագործող բոլոր խմբերն էլ երազողներ են»

Այս անգամ զրուցել ենք «Նեմրա» խմբի վոկալիստ եւ կիթառահար Վան Եղիազարյանի հետ։

- 3 բացահայտում Ձեր մասին, որ քչերը գիտեն:

- Անգամ մեկն եմ դժվարանում ասել, էլ ուր մնաց՝ միանգամից երեքը (ծիծաղում է): Իրականում, եթե ինչ-որ բանի մասին քչերը գիտեն, ուրեմն՝ ես եմ այդպես ցանկացել, բայց փորձեմ գտնել մի քանիսը... Օրինակ՝ փողոցների անունները, գրքերի վերնագրերն ու հեղինակներին, ֆիլմերի անուններն ու ռեժիսորներին չեմ հիշում. ուղեղիցս ջնջվում է այդ ինֆորմացիան: Նվերներ ընտրելը մեծ սթրես է. վատ եմ զգում, քանի որ միշտ չգիտեմ՝ դուր կգա, թե չէ, ու մտածում եմ՝ չհավանեց կամ իմ նվիրածի կարիքը չուներ (ծիծաղում է): Մեր «Daisy» երգը գրել եմ դաշնամուրով:

- Արվեստի 3 գործ, որոնք ամենաշատն են ազդել Ձեզ վրա:

- Վան Գոգի «Աստղալից գիշերը», Անտոնիո Վիվալդիի Կոնցերտ A մինոր, RV 522-ը, Ջոն Լենոնի «Imagine»-ը:

- Երաժշտություն ստեղծելու ամենասիրելի կողմերը:

- Ստեղծագործելու բոլոր կողմերն էլ սիրելին են: Երբեմն երգ գրելիս շնչակտուր ես լինում էմոցիաներից, հենց դա էլ ամենասիրելի մասն է:

- Իսկ ամենադժվարնե՞րը:

- Դժվարը մինչեւ ստեղծագործելն է՝ ինչ-որ դժվար շրջան ապրելը, բայց այն պահին, երբ կարող ես դրա մասին գրել, դժվարություններն արդարացված ու ինչ-որ չափով հաղթահարված են:

- 3 պատճառ, թե ինչու է երաժշտությունն այդքան հոգեհարազատ Ձեզ:

- Երաժշտություն էլ կա, երաժշտություն էլ: Ինձ միայն ճաշակով երաժշտությունն է հոգեհարազատ ու մեկ պատճառ կա՝ ամբողջությամբ զգում եմ. այն օդ ու ջրի պես պետք է ինձ:

- Ձեր կատարմամբ 3 ամենասիրելի երգերը:

- «Daisy», «She’s Beautiful», «Hmm»:

- Մի քանի բնութագիր, որ հատուկ է գրեթե բոլոր խմբերին:

- Խմբերն ինձ համար երկու մասի են բաժանվում՝ ստեղծագործող եւ իրենց երգերն ու ձեռագիրն ունեցող, մյուս մասը cover խմբեր են, որոնք կատարում են հայտնի երգերը: Ստեղծագործող բոլոր խմբերն էլ երազողներ են: Նաեւ հիմնականում բոլորը կարծում են, որ հանճարեղ բան են ստեղծել ու զարմանում, թե ինչու մարդիկ չեն գնահատում այնպես, ինչպես պետք է:

- 3 հոգեվիճակ, որ ունենում եք միայն բեմում:

- Ոգեւորվածություն, հաճույք, քաոս:

- 3 երգ, որոնք շրջադարձային են եղել աշխարհում ու մեծ հետք թողել:

- Երեքից շատ պետք է ասեմ, բայց միեւնույն է՝ շատ ավելին են՝ The Beatles-ի Yesterday-ը, Էլվիս Փրեսլիի Jailhouse rock-ը, Led Zeppelin-ի Stairway to Heaven-ը, Queen-ի Բոհեմական ռապսոդիան, Ջոն Լենոնի Imagine-ը, System of A Down-ի Chop Suey-ը, Մայքլ Ջեքսոնի Billie Jean-ը, Էմինեմի Lose Yourself-ը:

https://bravo.am/news/77580