Վարդանյան եղբայրները շարունակում են գրավել հայ հանդիսատեսի ուշադրությունը

Աշխարհի ամենաբարդ ժյուրիների սիրտը գրավված եղբայրները հայրենիքում են: Հանրահայտ Վարդանյան եղբայրները շարունակում են գրավել հայ հանդիսատեսի ուշադրությունը: Կրկեսային ներկայացումները Երեւանում մեկնարկեցին սեպտեմբերի 2-ին։

 

«Քանի որ մինչ օրս մենք հանդես ենք եկել միայն միջազգային հարթակներում, մեր հայրենակիցները մեզ հիմնականում տեսել էին հեռուստացույցով կամ համացանցում։ Այժմ ուզում ենք շփվել ու զգալ մեր հայրենակիցների ջերմ ընդունելությունը», – ասում է Գեւորգը։

 

Վարդանյան եղբայրների կողքին արենայում են նաեւ համաշխարհային կրկեսի այլ աստղեր՝ ձեռնածուներ, ծաղրածու, տրապիզիստներ, լարախաղաց ակրոբատ, դանակ նետողներ եւ աճպարար։ Ծրագիրը ոչ միայն երեխաների համար է հետաքրքիր, այլ նաեւ մեծահասակների ուշադրությանն է արժանացել։ Ակրոբատ եղբայրները ստեղծել են բոլոր հարմարավետ պայմանները, որ հանդիսատեսը լիովին վայելի այս յուրօրինակ կրկեսը։

 

Երեւանում արդեն հանրահայտ Վարդանյան եղբայրների չորրորդ ներկայացումն է կայանում, որին անձամբ եղբայրների կողմից մեծ սիրով եւ հարգանքով հրավիրված էին մասնակցելու 44-օրյա պատերազմի մասնակից հերոսների հարազատներ, ընտանիքի անդամներ, Արցախից Երեւան տեղահանված ընտանիքների երեխաներ եւ սոցիալապես անապահով բազմազավակ ընտանիքների ներկայացուցիչներ: Երեք ներկայացումների ընթացքում ավելի քան 400 հրավիրված հանդիսատես անվճար հնարավորություն է ունեցել հիանալ նմանը չունեցող աննախադեպ կրկեսային համարներով։ Այս քայլով եղբայրները մեկ անգամ եւս փաստում են, որ մշտապես կանգնած են իրենց հայրենիքի նվիրյալ զավակների կողքին եւ խոստանում, որ գեղեցիկ ավանդույթը շարունակական են լինելու , քանի որ մինչեւ նոյեմբեր յուրաքանչյուր շաբաթ եւ կիրակի նրանք տեղափոխելու են հայ հանդիսատեսին մեկ այլ իրականություն։

 

Եղբայրների խոսքով՝ առաջիկա 2-3 տարիների իրենց բոլոր պայմանագրերը խզել են եւ ժամանել Հայաստան։ Չի բացառվում, որ «Շապիտո» կրկեսի հաջողության դեպքում նրանք այստեղ մշտական կրկես կհիմնեն։ Գեւորգն ու Անդրանիկը վստահ են, որ կկարողանան բարձրացնել Հայաստանում կրկեսային արվեստի մակարդակը։ Հաջորդ ցուցադրությունը տեղի կունենա սեպտեմբերի 16-ին եւ 17-ին «Հրազդան» մարզադաշտի հարակից տարածքում։