Պետք է համատեղ դիմագրավենք ու ծանր որոշումներ կայացնենք. ԱՀ նախկին պետնախարարը փակագծեր է բացում Արցախում առկա իրավիճակի ու հնարավոր լուծումների վերաբերյալ

«Իրավունքի» զրուցակիցն է է ԱՀ նախկին պետնախարար Արտակ Բեգլարյանը։
-Պարոն Բեգլարյան, ադրբեջանական կողմը մինչև այս պահը չի կատարել խոստումը՝ Աղդամի ճանապարհին զուգահեռ բացել Լաչինի ճանապարհը, հակառակը, ադրբեջանական լրատվամիջոցները Աղդամի ճանապարհի բացումը, որպես հերթական հաջողություն են ակնկալում։ Կարելի՞ է ակնկալել, որ առաջիկայում կկատարի խոստումը։ 

-Եթե բավարար ճնշում չլինի հատկապես ռուսական կողմից՝ հաշվի առնելով, որ ռուսական կողմի միջնորդությունն է վիժեցրել Ադրբեջանը, ապա նման ակնկալիք դժվար է ունենալ: Իսկ Արևմտյան միջնորդները հավանաբար հանդես կգան նոր նախաձեռնությամբ՝ Ռուսաստանի Կարմիր խաչի մեքենայի մուտքից անկախ մեկ փաթեթով Լաչինի միջանցքով ու Ակնայի երթուղով որոշակի մարդասիրական մատակարարումներ ապահովելու նպատակով: Կարծում եմ, ամեն դեպքում, առաջիկայում որոշակի զարգացումներ կլինեն այդ առումով, իսկ Ադրբեջանը ձգտում է առիթից օգտվել ու առավելագույնս պոկել հատկապես արցախյան կողմից:

-Պարոն Բեգլարյան, արցախյան քաղաքական-հասարակական հատվածից  հնչում են տեսակետներ, որ ստեղծված իրավիճակը կարող է հանգուցալուծվել բացառապես ուժային տարբերակով, այս սցենարը, որքանո՞վ եք իրատեսական համարում։

-Մի կողմից հասկանում եմ նման ծանր իրավիճակում կտրուկ ու ոչ ստանդարտ քայլերի հանդեպ շատերի հակվածության տրամաբանությունը, մյուս կողմից պետք է մնալ ողջամտության սահմաններում և անդառնալի արկածախնդրության չդիմել: Ուժի կիրառման միջոցով Հայաստանի հետ կայուն հաղորդակցության վերականգնումը կարող է հնարավոր լինել, եթե գոնե մեկ ուժային կենտրոն ուղղակիորեն աջակցի դրան, իսկ Հայաստանի Հանրապետությունն անմիջականորեն ընդգրկվի այդ ռազմական գործողությանը: Իրականում միջազգային ինտերվենցիայի իրավական հիմքերն առկա են, քանի որ ցեղասպանություն է ընթանում, սակայն հավանականությունը շատ ցածր է, քանի որ ո՛չ հավաքական միջազգային հանրությունը և ո՛չ էլ անհատական առումով որևէ ազդեցիկ երկիր պատրաստ չէ նույնիսկ բավարար քաղաքական գործիքակազմ կիրառել ցեղասպանության հետագա ընթացքը կասեցնելու համար: Իսկ Հայաստանի Հանրապետության պատրաստակամության ու պատրաստականության մասին չեմ էլ խոսում: Դա նշանակում է, որ եթե նույնիսկ հնարավոր լինի միջանցքը բացել ուժով, ապա այն պահելն ու հետագա վատթարագույն հետևանքներից խուսափելը պարզապես անհնար է լինելու՝ շատ պարզ պատճառով, որովհետև ահռելի մեծ տարբերություն կա Արցախի ու Ադրբեջանի ռազմական կարողությունների միջև:

 -Ակնհայտ է, որ շրջափակման իրական դաժան դեմքը ի հայտ կգա եղանակների ցրտելուն զուգահեռ։Դուք հայր եք, ամուսին, որդի, եւ լավագույնս եք Ձեր մաշկի վրա զգում անելանելիության զգացումը, ինչպե՞ս եք կարողանում եւ կարողանալու հաղթահարել այս իրավիճակը, եթե առաջիկայում իրավիճակը չհանգուցալուծվի։
-Դժվար հարց է. Բոլոր ծնողներին էլ նման հարցերը շատ են հուզում: Ըստ իրավիճակի ու պայմանների բոլոր հնարավոր քայլերը կձեռնարկենք: Ամեն դեպքում պետք է հաշվի առնել, որ սա անհատական պայքար չէ, խնդիրը բոլորինն է, և համատեղ էլ պետք է դժվարությունները դիմագրավենք ու ծանր որոշումները կայացնենք: