Ադրբեջանի հիմնական նպատակը հիմա` բանակցությունների իմիտացիան է. Բենիամին Պողոսյան

Մյունխենի անվտանգության համաժողովի շրջանակներում  Հայաստանի, Ադրբեջանի և Գերմանիայի ղեկավարների եռակողմ հանդիպման արդյունքների վերաբերյալ "Իրավունքը" զրուցել է քաղաքագետ Բենիամին Պողոսյանի հետ. 

"Կարծում եմ, որպես այդպիսին, Մյունխենյան հանդիպումը որեւէ կարեւոր ձեռքբերում չի ունեցել: Նկատի ունեմ այն տեղեկույթը, որ հնարավոր էր ստանալ. թե պաշտոնական հաղորդագրությունները, թե` ադրբեջանական, թե` հայկական մամուլում գնահատումները, ինչպես նաեւ վարչապետի հանդիպումը Մյունխենի հայ համայնքի հետ հստակ ցույց է տալիս, որ ինչ-որ հստակ  նոր պայմանավորվածություններ չկան: Խոսվում է նաեւ, որ կողմերը պայմանավորվել են հարգել նախորոք ձեռք բերված պայմանավորվածությունները, բայց, եթե հաշվի առնենք, որ Ադրբեջանը վերջին երեք տարում ձեռք բերված բոլոր պայմանավորվածությունները արդեն խախտել է, հետեւաբար ասել, որ դրանք չեն խախտվի, մեղմ ասած, լուրջ չի հնչում:

Կարծում եմ,  Ադրբեջանի հիմնական նպատակը հիմա բանակցությունների իմիտացիան է, առաջին հերթին` երկկողմ հարթակում: Այսինքն` ինչ-որ  հանդիպումներ, քննարկումներ, դրանով իբր ցույց տալու, որ ինքը ինչ-որ տեղ կառուցողական կողմ է, շահագրգռված է խաղաղությամբ:  Բայց հասկանալի է , որ Ադրբեջանը պատրաստվում է  էսկալացիաների: Հիմնական նպատակն է  դուրս չգալ բանակցություններից, հանդես գալ կառուցողական կողմ եւ էսկալացիաների ժամանակ մեղադրել  Հայաստանին` հայտարարելով, որ Հայաստանն էր ապակառուցողական եւ փաստացի Հայաստանի մեղքով բանակցությունները ոչնչի չհանգեցրին: Դրա համար ամեն դեպքում նրանք կփորձեն երկկողմ բանակցությունների իմիտացիա իրականացնել եւ ժամանակ առ ժամանակ միջազգային հարթակներում ինչ-որ քայլեր կանեն:  Օրինակ` հանդիպումը Մյունխենում, չի բացառվում, որ Բրյուսելում ինչ-որ հանդիպում լինի ղեկավարների կամ արտաքին գործերի նախարարների մակարդակով, ինչի մասին խոսվեց: Սակայն Ադրբեջանը ռազմավարությունը մեկն է` բանակցությունների իմիտացիա եւ նախապատրաստություն ռազմական էսկալացիաների:

Իսկ որքանով է Ադրբեջանը իրոք շահագրգռված  մոսկովյան հարթակում բանակցությունները շարունակել, բարդ է ասել:  Հնարավոր է, իմանալով, որ Հայաստանը մերժում է այն , Ադրբեջանը ասում է, որ ինքը համաձայն է` հայ-ռուսական հարաբերությունները ավելի սրելու  եւ Ռուսաստանի աչքում Հայաստանը էլ ավելի սեւացնելու նպատակով: Ամեն դեպքում քանի դեռ Հայաստանը հրաժարվում է մոսկովյան հարթակում բանակցել, բանակցություններ չեն լինի` անկախ նրանից Ադրբեջանը դա իրոք ցանկանում է, թե` ոչ":

Պատրաստեց Զարուհի Բաբուխանյանը