Ով «յոթ փակի» տակ գտնվող արցախցի` լրտեսության մեջ մեղադրվողի փաստաբանը

Արցախի հայաթափումից հետո Արցախում մնացած, օրեր առաջ էլ Հայաստան վերադարձած Սարգիս Գալստյանը անմիջապես ձերբակալվել է ենթադրաբար Ադրբեջանի օգտին լրտեսության մեղադրանքով։ «Մարտի 30-ին նախաձեռնվել է քրեական վարույթ, որի շրջանակներում նշված անձին ներկայացվել է մեղադրանք լրտեսության համար։ Նրա նկատմամբ որպես խափանման միջոց է ընտրվել կալանքը։ Նախաքննության շահերից ելնելով՝ հավելյալ տեղեկատվություն այս պահին հրապարակման ենթակա չէ», - տեղեկացրել էր Քննչական կոմիտեն:

Նկատենք, որ Սարգիս Գալստյանն Արցախում տարբեր պաշտոններ է զբաղեցրել, 1990-ականներին մասնակցել է պատերազմական գործողություններին, աշխատել է Ազգային անվտանգության ծառայությունում, եղել է Շուշիի վարչական շրջանի ղեկավարի տեղակալը, ապա աշխատել Ռազմահայրենասիրության և կրթության նախարարությունում։

Իսկ, թե ինչո՞ւ է որոշել ամիսներ անց միայն վերադառնալ մինչ այս պահը դեռ հայտնի չէ: Արցախցիները նշում են, որ վերջինս ունի փաստաբան, սակայն, թե ով է, զարմանալիորեն պահում են յոթ փակի տակ: Մեզ հաջողվեց պարզել միայն, որ վերջինիս վստահաբար ոչ մի արցախցի փաստաբան չի պաշտպանում: Իսկ, թե ով է նրան պաշտպանում եւ ինչ պայմաններով արցախցիները դժվարացան պատասխանել: 

Սարգիս Գալստյանի մասին Արցախի ՄԻՊ Գեղամ Ստեփանյանն էլ շատ տեղեկատվության չի տիրապետում.

-Կարող եմ ենթադրություն անել, որ հավանաբար այս ընթացքում Ադրբեջանում գտնվելու, նրա և իր ընտանիքի անդամների ակտիվությունը ինստագրամյան հարթակներում և այլն, հնարավոր է այս ամեն ինչի համադրությունն է պատճառ հանդիսացել՝ նման մեղադրանք առաջադրելու: Այլ տեղեկատվության չեմ տիրապետում: