Հնդիկ կնոջն արգելափակել են բջջային հավելվածում անսովոր անվան պատճառով

Ավստրալիայում հնդիկ աղջկան արգելափակել են բջջային հավելվածում՝ Սվաստիկա անսովոր անվան պատճառով։ Կինը Nine–ին պատմել է ընկերության դեմ իր պայքարի մասին։

Սիդնեյի 35-ամյա բնակչուհի Սվաստիկա Չանդրան կորցրել է Uber բջջային հավելվածի և դրա բոլոր գործառույթների հասանելիությունը։ Կնոջն արգելափակել են իր անվան պատճառով, որը ընկերությունն անպատշաճ է համարել գրանցման ժամանակ օգտագործելու համար։

Չանդրան ասել է, որ իր անունը նշանակում է «հաջողություն և բարգավաճում»: Այն շատ տարածված անուն է Հնդկաստանում և օգտագործվել է Հիտլերից հազարավոր տարիներ առաջ, հավելել է նա:

«Մի անգամ ցանկացա սննդի առաքում անել հավելվածի միջոցով, և երբ արդեն անցել էի վճարումը, ինձ տեղեկացրին, որ հաշիվն արգելափակված է իմ անվան պատճառով»,- հիշում է կինը։ «Ափսոս, որ մարդիկ այդքան անկիրթ են։ Իմ անունը շատ տարածված է, ես անձամբ ճանաչում եմ անվանակից ևս չորս կնոջ»։

 Uber-ը ի վերջո ներողություն է խնդրել և Չանդրային վերադարձրել հասանելիությունն իր հաշվին: