Ինչ արել ենք, արել ենք` բացառապես ելնելով մեր խղճից. Անի Սամսոնյան

«Իրավունք»-ի զրուցակիցն է ԱԺ նախորդ գումարման «Լուսավոր Հայաստան» խմբակցության պատգամավոր ԱՆԻ ՍԱՄՍՈՆՅԱՆԸ:

— Դուք հայտարարել էիք, որ սպասում եք Բագրատ Սրբազանին Երեւանում, ինչը լայն արձագանք գտավ, սա նշանակո՞ւմ է, որ «Լուսավոր Հայաստանը» պահանջում է Նիկոլ Փաշինյանի հրաժարականը:

- «Լուսավոր Հայաստան»-ը 2021 թվականից պահանջել է Նիկոլ Փաշինյանի հրաժարականը եւ մեկ անգամ արդեն հասել է դրան։

— Բայց ինչպե՞ս եք պատկերացնում համախմբումն այն մարդկանց հետ, որոնց հետ, մեղմ ասած, նույն քաղաքական հայացքները չեք կիսել` առնվազն մինչեւ Ձեր կուսակցության նախագահ Էդմոն Մարուքյանի կողմից հատուկ հանձնարարություններով դեսպանի պաշտոնից հրաժարականը:

— Ես սատարում եմ Բագրատ Սրբազանի եւ տավուշեցիների արդար բողոքը ու պատրաստ եմ կանգնել շարժման կողքին, որպեսզի սահմանազատման անարդար եւ միակողմանի գործընթացը վերանայվի, ու իշխանությունը հասկանա, որ սպառնալիքի տակ չի կարող ոտնահարել սեփական ժողովրդի կենսական շահերը եւ անվտանգությունը՝ դա «փաթեթավորելով» որպես խաղաղություն կամ խաղաղության ձգտում։

— Իսկ ինչպե՞ս եք տեսնում հանգուցալուծումն այս շարժման՝ ո՞ւմ պետք է փոխանցվի իշխանությունը կամ, ի վերջո, ինչպե՞ս պետք է լուծվի սահմանագծման եւ սահմանազատման մեկնարկած գործընթացը:

— Շարժումը դեռ ծնվում է Տավուշ-Երեւան ճանապարհին։ Պետք չէ այդ շարժման շուրջ ձեւևավորել էյֆորիա կամ տիեզերական ակնկալիքներ կամ հակառակը՝ վարկաբեկել եւ դատապարտել տապալման։ Հույս ունեմ, որ շարժման առաջնորդ Բագրատ Սրբազանը մինչեւ վերջ կպաշտպանի մարդկանց արդար բողոքի ձայնը քաղաքական սպեկուլյանտներից ու պատեհապաշտներից, թույլ չի տա փչացնել դրա նպատակը եւ օրակարգը։ Միայն այդ դեպքում այն կստանա համաժողովրդական վստահություն եւ սառը ջուր կլցնի իշխանությունների՝ «բեսպրեդելից» եւ մեծամտությունից տաքացած գլուխներին։

— Ըստ Ձեզ` ի՞նչ սպասել Նիկոլ Փաշինյանի մայիսի 8-ի այցից Մոսկվա:

— Կարծում եմ՝ ոչ մի արտասովոր բան՝ բացի ԵԱՏՄ հասցեին գովասանքներից։

Դուք ընդունո՞ւմ եք, որ Ձեր կուսակցությունն առնվազն՝ 2018-ին եւ 2020-ից հետո սխալվել է Նիկոլ Փաշինյանի հարցում:

— Մենք 2018-ին մեր պարտքն ենք համարել` իմաստության կոչ ուղղելու ժողովրդին, եւ այդ կոչը տեղ չի հասել։ Ինչ արել ենք, արել ենք` բացառապես ելնելով մեր խղճից եւ նպատակներից՝ հանուն մեր պետության։ Պաշտոնի համար չենք ծախվել, պաշտոններից չենք կառչել, իմացել ենք մեր խոսքի արժեքը եւ միշտ պատասխան ենք տվել մեր գործողությունների համար։ Դուք խոշորացույցով փնտրեք, չեք գտնի մի պաշտոնյա, ով պաշտոնը լքելիս բացատրություն է տալիս ժողովրդին, թե ինչու է լքել այդ պաշտոնը, իսկ Էդմոն Մարուքյանը հաշվետու է եղել եւ այդ հարցի պատասխանը ազնվորեն տվել է մարդկանց։

ԴԻԱՆԱ ՄԱՆՈՒԿՅԱՆ

Այս թեմայով Իրանում հանդիսավորությամբ նշվել է Հայաստանի Անկախության տոնը Վիրավոր իմ Հայաստան, դու դեռ ուղղելու ես քո ողնաշարը Օպերային երգիչներին ու Կապելլային՝ չնչին գումարներ, տաշ-տմբլ երգողներին՝ բազմապատիկ ավել․ Սուքիասյան Ի՞նչ են քննարկել «Ուժեղ Հայաստան»-ի եւ «Հայաստան»-ի ղեկավարները Գուցե արժե հարցնեք ինքներդ ձեզ՝ ինչի՞ եք հասցրել այս երկիրը․ ԶԱՐՄԱՆՔ