«ՈՉՆՉԱՑՐԵԼ Է ԴԻՎԵՐՍԻՈՆ ԽՄԲԵՐԻ ՈՒ ՀԵՏ ՇՊՐՏԵԼ ՀԱԿԱՌԱԿՈՐԴԻ ՄԵԾԱԹԻՎ ԿԵՆԴԱՆԻ ՈՒԺԵՐԻ». ԱՆՄԱՀ ՀԵՐՈՍ ՀԱՅԿ ՂԱԶԱՐՅԱՆ

2020 թվականի սեպտեմբերի 27-ին սկսված Արցախյան 44-օրյա ահաբեկչական պատերազմը, ցավոք խլեց հազարավոր լուսավոր հայորդիների ջահել կյանքը, թողնելով նրանց երազանքները անկատար։ Նրանցից մեկն էլ անմահ հերոս ՀԱՅԿ ՎԱՀԱՆԻ ՂԱԶԱՐՅԱՆՆ էր։ Այսօր, մայիսի 20-ը, նրա ծննդյան օրն է, կդառնար 27 տարեկան։ Անմահ հերոսի շիրիմին են այցելել հարազատներ, համագյուղացիներ, ընկերներ, ծաղիկներ խոնարհել ու խնկարկել։ Հայկ Ղազարյանը ծնվել է 1997 թվականին, Կոտայքի մարզի Աբովյան քաղաքում։ Նրա բարեկամուհին Iravunk. com -ի հետ զրույցում նշեց.

«Հայկը շատ ակտիվ ու ընկերասեր մարդ էր։ 2004-2015թթ. սովորել է Արամուսի Վ. Առաքելյանի անվան միջնակարգ դպրոցում։ Դպրոցական տարիներին, նա միշտ աչքի էր ընկնում բարձր առաջադիմությամբ, պարգևատրվել է բազմաթիվ գովասանագրերով ու պատվոգրերով, բարձր դասարաններում մի քանի տարի ղեկավարել է «Աշակերտական խորհուրդը»։ Հայկը առաջատար էր նաև սպորտի ասպարեզում, նա պարապում էր կարատե մարզաձևով։

2008֊2015թթ. եղել է ՀՀ Գոսոկու ֊րյու միջազգային կարատեի ասոցիացիայի մարզիկ, ստացել է «սև գոտի» և «սեմպայ» կոչում։ Պարգևատրվել է բազմաթիվ մեդալներով ու պատվոգրերով, բազում անգամներ դառնալով Հայաստանի չեմպիոն։

2015֊2019 թթ. հայրենասեր երիտասարդը սովորել և ավարտել է Վազգեն Սարգսյանի անվան ռազմական համալսարանը։ Այստեղ ուսանելու տարիներին ևս աչքի է ընկել բարձր առաջադիմությամբ, մարդկային բարձր որակներով, կարգապահությամբ, ծնողները երեք անգամ ստացել են շնորհակալական նամակ, կարգապահ կուրսանտ դաստիարակելու համար։ 2019֊ին, Հայկը ծառայության է անցել Ջրականում, որպես դասակի հրամանատար։ 2020֊ին, տեղափոխվել է նույն զորամասի ուսումնական գումարտակ նշանակվելով նորակոչիկների դասակի հրամանատար։

2020 թվականի սկսված Արցախյան 44֊օրյա դաժան պատերազմի առաջին իսկ օրից, Հայկը ակտիվ մասնակցություն է ունեցել։ Նա հրաման էր ստացել զբաղեցնել ՀԳՄ պաշտպանության շրջանը։ Սեպտեմբերի 28֊ին, Հայկը մարտի դաշտից անձամբ հանել է մեծ թվով վիրավորների ու զոհերի։ Մինչև հոկտեմբերի 2֊ը, գտնվել է տվյալ տեղամասում, ոչնչացրել դիվերսիոն խմբերի և հետ շպրտել հակառակորդի մեծաթիվ կենդանի ուժեր։ Հոկտեմբերի 2֊ին, ժամը 21։00֊ից 22։00 ֊ն ընկած ժամանակահատվածում հրաման է ստացել օգնել 2 ՀԳՄ ֊ի ստորաբաժանումներին շրջափակման մեջ չընկնելու նպատակով։ Այդ շրջանում էլ սկսվել է թշնամու կողմից լայնածավալ հրետակոծությունը, որի հետևանքով էլ Հայկը ստացել է մահացու բեկորային վիրավորում։ Նա կամային ու անձնվեր զինծառայող էր, շատ սիրված ու հարգված հրամանատարության և ծառայակիցների կողմից։ Անձնվեր ծառայության համար, հետմահու պարգևատրվել է «Արիության համար», «Մարտական ծառայության», «Հայրենիքին մատուցած ծառայությունների համար» 1-ին աստիճանի մեդալներով»։

ՇՆՈՐՀԱՎՈՐ ԵՐԿՆԱՅԻՆ ԾՆՈՒՆԴԴ, ԱՆՄԱՀ ՀԵՐՈՍ ։ՔՈ ՍԽՐԱՆՔՆ ԱՆՄԱՀ Է, ՔՈ ԱՆՈՒՆԸ ՄԵՐ ՍՐՏԵՐՈՒՄ ։ՀԱՎԵՐԺ ՓԱՌՔ ՄԵՐ ԲՈԼՈՐ ՀԵՐՈՍՆԵՐԻՆ ։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ