«Փաստ». Արևմուտքն անցնում է բաց «խաղի՞»

«Փաստ» օրաթերթը գրում է. «Նախօրեին, կարելի է ասել, սենսացիոն հայտարարություն է արել Վրաստանի վարչապետ Իրակլի Կոբախիձեն: Նա պնդել է, որ եվրակոմիսարներից մեկն իր հետ հեռախոսազրույցում, ի թիվս այլ «միջոցների», իրեն սպառնացել է ֆիզիկական հաշվեհարդարով՝ բերելով Սլովակիայի վարչապետ Ռոբերտ Ֆիցոյի օրինակը, որի դեմ օրերս մահափորձ էր իրականացվել: Հասկանալի է, պատճառը ֆինանսական թափանցիկության օրենքն է: Սակայն Կոբախիձեն նշել է, որ Վրաստանին կհաջողվի պահպանել խաղաղություն և ներքին կայունություն, չնայած որոշ վտանգավոր ուժերի ջանքերին: Ի դեպ, Կոբախիձեն, որպես այդպիսին, հերթական անգամ նշում է «Պատերազմի գլոբալ կուսակցության» մասին:

Սրան զուգահեռ երեկ հայտարարություն է տարածել ԱՄՆ պետքարտուղար Էնթոնի Բլինքենը՝ խոսելով «ԱՄՆ-Վրաստան համագործակցության համապարփակ դիտարկման» մեկնարկի մասին։ «Պետդեպարտամենտը մեկնարկում է Վրաստանի համար վիզային ռեժիմի սահմանափակման քաղաքականություն, որը կտարածվի Վրաստանում ժողովրդավարության խաթարման համար պատասխանատու կամ մեղսակից անձանց, ինչպես նաև նրանց ընտանիքների անդամների վրա: Այսօր ես նաեւ մեկնարկում եմ Միացյալ Նահանգների եւ Վրաստանի միջև երկկողմ համագործակցության համապարփակ դիտարկումը»,-ասել է Բլինքենը: Ի՞նչ է սա նշանակում: Ըստ փորձագետների, սա փաստացի նշանակում է, որ Արևմուտքին չի հաջողվել խամաճիկ դարձնել Վրաստանը՝ այն վերածելով անկայունության ու Ռուսաստանի հետ հակամարտության գոտու: Վրաստանի իշխանությունները հետևողական են եղել հավասարակշռության, խաղաղության ու կայունության պահպանման իրենց գործելաոճին: