Պետք չէ դրան քաղաքական հնչեղություն հաղորդել, ինչքան էլ այդ «զանգի» ձայնը ախորժելի լինի․ Օկուպացված Արցախի պատգամավորը արցախցի համայնքապետերի կալանավորման մասին

ՀՀ Քննչական կոմիտեն Արցախի երեք համայնքների ղեկավարների նկատմամբ քրեական հետապնդումներ է սկսել։

Մարտակերտի քաղաքապետ Միշա Գյուրջյանը դատարանի մայիսի 25-ին որոշմամբ կալանավորվել է 2 ամսով, մայիսի 27-ին Ստեփանակերտի քաղաքապետ Դավիթ Սարգսյանը կալանավորվել է 20 օրով, իսկ Ասկերանի քաղաքապետ Հայկ Շամիրյանի նկատմամբ կիրառվել է տնային կալանք։ ՀՀ Քննչական կոմիտեի հաղորդմամբ՝ քաղաքապետները մեղադրվում են խարդախությամբ խոշոր չափերով հափշտակություն կատարելու մեջ։

Արցախի ՄԻՊ Գեղամ Ստեփանյանի համոզմամբ, Ասկերանի, Մարտակերտի ու Ստեփանակերտի քաղաքապետների դեմ մեկնարկած քրեական վարույթները անընդունելի են։ Ըստ նրա, հետապնդումներն ունեն հստակ քաղաքական ենթատեքստ:

Իսկ ինչ են մտածում վերոնշյալի վերաբերյալ արցախցի նախկին պատգամավորները, եւ ահա նախկին պատգամավոր Կարեն Հովհաննիսյանը փաստում է․

- Մինչ վերոնշյալ համայնքապետերին կալանավորելը շատ-շատ արցախցիներ նեղ ընկերական միջավայրում, հաճախ նաև բլոտի սեղանի շուրջ, մեկ մեկ էլ «ալո Սիրուշ լսելես, որ մեր գեղապետը իրա ծառայողականը ծախել է» կոնտեքստի մեջ շատ էին շահարկում, որ անօրինականություններ են տեղի ունենում, սոցիալական ցանցերում թիրախավորում էին Արցախի կառավարությանը, թե հետներդ բերած գույքը որտեղ է, վաճառեք տվեք ժողովրդին, ու հիմա երբ կալանավորվեցին մի քանի համայնքապետերի, պետք չէ դրան քաղաքական հնչեղություն հաղորդել, ինչքան էլ այդ «զանգի» ձայնը ախորժելի լինի, իսկ պայքարողը, եթե իր պայքարի մեջ վճռական է, նպատակասլաց  ոչ մի խոչընդոտից չի ընկրկի։

Իմ հերթին կցանկանայի, որ այդ խնդիրը՝ կապված համայնքապետերի հետ, շուտ և անհետևանք լուծվի, քանզի ճանաչում եմ վերջիններիս և գիտեմ իրենց բարի, մարդկային կերպարը, հուսով եմ շփոթմունք էր, իսկ եթե քաղաքական աստառ կա տակը, ապա իմ համար այս ամենը արդեն նմանվում է ֆարսի։ Մեր առջև իրոք մեծ մարտահրավեր կա և դրան դիմակայելու համար անհրաժեշտ է միասնականություն և ոչ թե օտար տարբեր օրակարգերի սպասարկում։