Ձևավորվում է կարծիք, որ իրենցից շատերն արդեն իսկ ամուսնացել են մանդատների հետ ու պատրաստ չեն ամուսնալուծվել. Գեւորգ Պետրոսյանը խորհրդարանական ընդդիմության մասին

Խորհրդարանական ընդդիմությունից հայտարարում են, որ վարչապետին անվստահություն հայտնելու գործընթացի համար չկա հանրային անհրաժեշտ ճնշում, այս պարագայում ի՞նչ պետք է անի ընդդիմությունը։ Հնարավո՞ր է, որ խորհրդարանական ընդդիմությունը չի գնում այդ քայլին, որովհետև չունի նման թույլտվություն իրենց քաղաքական թիմի ղեկավարից, եթե ոչ ուրեմն ինչո՞ւ մանդատները վայր չեն դնում հարցի պատասխանը իրավագիտության դոցենտ, փաստաբան ԳԵՎՈՐԳ ՊԵՏՐՈՍՅԱՆ.

-Ես վերահաստատում եմ իմ տեսակետը․ Հայաստանում իրավիճակի փրկությունը բացառապես խորհրդարանական, հետևաբար, նաև սահմանադրական ճգնաժամ առաջացնելն է։ Իրավական այս անլուրջ քայլերը մաշում են շարժումը, այս նեղ պահին սխալներ թույլ տալու իրավունք չունեն, պետք է ճիշտ կշռադատել, հաշվարկել, վերլուծել Սահմանադրության նորմերը, այլ  ոչ թե կանգնել նման անխոհեմ հայտարարություններ հեղինակել, դրանով ընդամենը ժողովրդին պահել փողոցում։ Ես էլ կարող եմ ասել, որ այս ամենը շարժումը դիտավորյալ մաշեցնելու նպատակ ունի անհայտ, գուցեև հայտնի մարդկանց կողմից, որոնց մասին մենք դեռ չգիտենք:

Մանդատները վայր դնելով ու իրենց ցուցակները մաքրելով՝ ստեղծում են խորհրդարանական ճգնաժամ, Սահմանադրության մի քանի հոդվածում ու «Ազգային ժողովի կանոնակարգ» սահմանադրական օրենքի բազմաթիվ հոդվածներում պարտադիր է խորհրդարանում ընդդիմության առկայությունը։ Ընդդիմության լիակատար հրաժարականը այս իշխանությունից ազատվելու անարյուն ու սահմանադրական ճանապարհն է։ Եթե իրենք չգնան այդ քայլին, ողջամտորեն ձևավորվում է կարծիք, որ իրենցից շատերն արդեն իսկ ամուսնացել են մանդատների հետ ու պատրաստ չեն ամուսնալուծվել։