Պետք չէ ամեն մի աղբ համարել մշակույթ. Կարեն Գրիգորյան

«Իրավունք»-ի զրուցակիցն է ջազմեն ԿԱՐԵՆ ԳՐԻԳՈՐՅԱՆԸ, ով բարձր է գնահատում ներկայիս երաժշտական, մշակութային սանդղակը եւ երիտասարդ սերնդի մեջ տեսնում ապագան։

«ՍԻՐԱՀԱՐՎԵՑԻ ԱՅԴ ԲԼՅՈՒԶԱՅԻՆ ՀՆՉՅՈՒՆՆԵՐԻՆ»

— Քա՞նի տարեկանից եք զբաղվում երաժշտությամբ եւ ինչո՞ւ ընտրեցիք ջազը:

— Իմ առաջին երաժշտական գործիքը դհոլն էր։ Ես երկու տարեկան էի, հայրս տանը նվագում, պարապում էր ու նկատեց, որ ես սեղանի վրա կամ առհասարակ որտեղ հնարավոր էր, փորձում էի նվագակցել իրեն: Եվ նա ինձ համար դհոլ գնեց: Սակայն երբ առաջին անգամ դիտեցի Ռեյ Չարլզի մասին ֆիլմը, սիրահարվեցի այդ բլյուզային հնչյուններին ու հասկացա, որ սա այն երաժշտությունն է, որը ուզում եմ նվագել:

— Առանձնացրեք երեք ջազմենների, ովքեր իրենց ազդեցությունն են ունեցել Ձեր ընտրության հարցում:

— Երաժիշտները շատ են՝ Չարլի Փարկեր, Բադ Փաուել, Դիզի Գիլեսպի եւ այսպես շարունակ, բայց շատ կարեւոր ազդեցություն է թողնում, երբ լսում ես կենդանի համերգներ։ Երբ սկսում էի սիրահարվել այս երաժշտությանը, վերջնական ինձ օգնեց Վահագն Հայրապետյանի եռյակը՝ Արմեն Չիկո Թութունջյանի եւ Սիմոն Դոլմազյանի հետ։ Ես ոչ մի համերգ բաց չէի թողնում եւ իրենցից միշտ սովորել ու սովորում եմ։

— Ինչպե՞ս կգնահատեք հայ երիտասարդների սերը դեպի ջազն այսօր:

— Շատ լավ, խոստումնալից երիտասարդներ ունենք՝ միշտ մեծ էներգիայով:

«ԱԶՆԻՎ ՊԵՏՔ Է ԱՆԵԼ ԱՅՆ, ԻՆՉ ՔՈ ՄՏՔՈՒՄ ՈՒ ՍՐՏՈՒՄ Է»

— Ըստ Ձեզ` ի՞նչ է կատարվում հայ մշակույթում:

— Մշակույթում շատ հաջողություններ ենք գրանցում, մասնավորապես՝ կինոերաժշտության մեջ։ Ամեն անգամ մի լավ նորություն ենք լսում՝ նոր ստեղծագործություն, ինչը հպարտանալու առիթ է տալիս։ Պարզապես պետք չէ ամեն մի աղբ համարել մշակույթ։

— Ինչո՞ւ է ավելի հասու եւ ցանկալի դարձել անորակ երաժշտությունը, եւ արդյո՞ք մեղավորությունը այն մատուցողների մեջ չէ:

— Դա գալիս է ինֆորմացիայի պակասից։ Այսօր կոշկակարը կամ մեքենայի արհեստավորը շատ հանգիստ կարող է դառնալ երգիչ։ Պարզապես ինչ-որ գումարով ձայնագրման ստուդիայում ձայնագրվելով, այնուհետեւ գովազդ միացնելով։ Այժմ շատերը այս եղանակով են դառնում «հայտնի»։ Իհարկե, ցավալի է, բայց փաստ, սակայն դա ապրում է մի քանի օր ու մահանում եւ ոչ մի արժեք իրենից չի ներկայացնում:

— Դուք ստեղծագործում եք եւ թողարկել եք Ձեր ալբոմը, պահանջարկը մե՞ծ է նմանատիպ երաժշտության:

— Ստեղծագործելուց չեմ դիտարկում դա այսօրվա հանդիսատեսի համար է, թե՝ ոչ, կամ ինչքան մարդ կլսի: Պարզապես ազնիվ պետք է անել այն, ինչ քո մտքում ու սրտում է։ Իմ գրած երաժշտությունը ես եմ։ Առհասարակ, խորհուրդ կտամ երաժիշտներին՝ չտրվել սադրանքների ու ավել գումարի դիմաց իրենց միջի երաժշտությունը չարժեզրկել։

«ԱՄԵՆԱԹԱՆԿԸ ԺԱՄԱՆԱԿՆ Է, ՊԵՏՔ Է ԳՆԱՀԱՏԵԼ ՈՒ ՃԻՇՏ ՕԳՏԱԳՈՐԾԵԼ»

— Ապագայում ի՞նչ ծրագրեր ունեք՝ որպես երիտասարդ ջազմեն։

— Սկսում եմ երկար սպասված դասերս։ Դասավանդելու եմ «Ուլիխանյան ջազ ակումբ»-ում։ Շատերն էին հարցնում՝ դասավանդելո՞ւ եմ, թե՝ ոչ։ Սիրով պատասխանեմ, որ՝ այո, կկիսվեմ այն փորձով, որով անքուն գիշերներ եմ անցկացրել։

— Ի՞նչ խորհուրդ կտաք երիտասարդ սերնդին:

— Ամենաթանկը ժամանակն է, այն պետք է գնահատել ու ճիշտ օգտագործել։ Անիմաստ ժամանակ չվատնել տարատեսակ բաների վրա, այլ կայանալ, պարապել, լսել լավ երաժշտություն եւ, իհարկե, չստացվելու դեպքում՝ չհուսահատվել, այլ շարունակել աշխատել այնքան, մինչեւ արդյունքը կգոհացնի։

ՆԱՆԱ ՍԱՐԳՍՅԱՆ

Այս թեմայով Սամվել Կարապետյանի կալանավորումը ընդդիմության օրակարգ չի կարող լինել․ Խորեն Գրիգորյան Ինչպես քոչարյանականները խաբեցին ընտրազանգվածին Ցվայգն ու ՔՊ-ի ցուգցվանգը․ ԶԱՐՄԱՆՔ Մեր տանն էլ են խուզարկություն անում, բայց ես որպես եղբայր եմ այստեղ, քաղաքականությամբ չեմ զբաղվում ⚡️⚡️«Իրավունք» թերթի այսօրվա տպագիր համարում կարդացե՛ք...