Մենք չենք մուրում, այլ մեր աշխատանքի հասանելիք գումարն ենք պահանջում. Օպերային թատրոնում արշալույսները խաղաղ չեն

Ամենուր բարձր գոռալով` ներկայացնում ենք հայ մշակույթը, թե բա՝ մենք այն հնագույն ազգերից ենք, ովքեր դարեր ի վեր մշակույթ են պահել, կերտել եւ փոխանցել սերունդներին: Սակայն, այսօր երբ նայում ենք իրականությանը, թե ինչ է կատարվում մշակույթում, սարսափ ենք ապրում, լինի կինո, երգ, նկարչություն, թե՝ պար:

Եվ ահա, այժմ էլ բողոքում են Ալեքսանդր Սպենդիարյանի անվան օպերայի եւ բալետի ազգային ակադեմիական թատրոնի արտիստները: Բանն այն է, որ նրանք չեն ստացել հոկտեմբեր ամսվա ելույթավճարները, իսկ արդեն դեկտեմբեր ամիսն է, այսինքն՝ նախորդ պարտքին գումարվել է նոյեմբեր եւ դեկտեմբեր ամսվա ելույթավճարները: Մեզ դիմած արտիստը, ով խնդրեց պահել գաղտնիությունը, հայտնեց, որ նման բան առաջին անգամ է լինում, եւ իրենք ապշած են եղածից:

«Մենք ստանում ենք գումար, ամիսը 2 անգամ: Առաջին 15 օրյակում պետական աշխատավարձ, իսկ երկրորդում` նախորդ ամսվա ելույթավճարները: Նոյեմբերին ստացել ենք աշխատավարձը, իսկ ելույթավճարները մինչեւ հիմա չկան: Դիմել ենք Կրթության, գիտության, մշակույթի եւ սպորտի նախարարություն: Նախարարությունից մեզ պատասխանեցին, որ ելույթավճարները պետական վճարների հետ կապ չունեն, եւ դրա պատասխանատվությունն իրենց վրա չէ»,-ասաց մեր զրուցակիցը:

Ելույթավճար ստանում են գեղարվեստական, այսինքն՝ արտիստական կազմը, որի մեջ մտնում են բալետային թատերախումբը, երգչախումբը, օպերային մենակատարները, մնջախաղի բաժինը, նվագախումբը եւ գեղարվեստաբեմադրական կազմը սպասարկող անձնակազմը:

Նշենք, որ դեռեւս 2021 թվականին ժամանակավոր պաշտոն զբաղեցրած, այնուհետ ընտրված տնօրենի՝ Կարեն Դուրգարյանի օրոք որոշվել էր, որ Օպերայի եւ բալետի ակադեմիայի արտիստներն ու աշխատակազմը կստանան նաեւ ելույթավճար, սակայն այժմ արտիստների բնական պահանջին պատասխանում են, որ բյուջե չկա:

Անշուշտ, «Իրավունք»-ը հետաքրքրվեց, թե որքա՞ն տոմս է վաճառվում, որքա՞ն ներկայացում է բեմադրվում, եւ ի՞նչ արժե տոմսը: Տոմսի արժեքը սկսում է 5000-ից մինչեւ 25.000 դրամ եւ, ըստ մեր զրուցակցի, նրանք բավականին խիտ ռեժիմով ներկայացումներ են ունենում՝ ամիսը 20-ից 25 ներկայացում:

«Գրեթե  բոլորս՝ արտիստները, ունեն բանկային պարտքեր, վարկեր, եւ հիմա, երբ չեն վճարում մեր հասանելիք գումարը, որը մենք չենք մուրում, այլ մեր աշխատանքի դիմաց ենք պահանջում, ապա ի՞նչ պիտի պատասխան տանք բանկին, որպեսզի սեւ ցուցակում չհայտնվենք: Կա՛մ  ուսանող ունենք, տան վարձ ենք վճարում, կա՛մ հիվանդ խնամում: Եվ վերջապես, ի՞նչ կապ ունի ինչ ենք անելու մեր արդար քրտինքով վաստակած գումարը: Թող վճարեն, մենք կորոշենք ինչպես ծախսենք», - ընդգծեց արտիստը:

Ի դեպ, արտիստները դեռեւս չեն ստացել նոյեմբեր ամսվա պետական աշխատավարձերը եւս: Ըստ ԿԳՄՍ նախարարության հաշվապահի, աշխատավարձերը կփոխանցվեն մինչ դեկտեմբերի 15-ը:

«Այն վիճակում է հայտնվել ողջ անձնակազմը, բոլորը սկսել են պարտքով գումար գտնել՝ մինչ կստանան ելույթավճարներն ու աշխատավարձերը: Այնպիսի մի լաբիրինթ սարքեցին, որ մարդ չի հասկանում, թե որ գումարը ո՞ր ելույթից ու ո՞ր ամսվա համար պիտի ստանա»,- իր խոսքն ավարտեց ահազանգող արտիստը:

Մինչ նյութը կլիներ պատրաստ, մեր տեղեկությամբ՝ արդեն իսկ սկսել են որոշակիորեն բաժաննել հոկտեմբեր ասմվա ելույթավճարները, սակայն առջեւում դեռ կան նոյեմբերի ելույթավճարները, ինչպես նաեւ երկու ամսվա աշխատավարձը՝ նոյեմբեր եւ դեկտեմբեր: Իսկ դեկտեմբերի ելույթավճարը կփոխանցվի հունվար ամսվա մինչեւ 15-ը:

Հավելենք, որ խոսակցություն է պտտվում, որ հավելավճարները եւս կարող են հարկվել: Սակայն այս մասին «Իրավունք»-ը կանդրադառնա առավել մանրամասն՝ հստակ տեղեկատվություն ունենալուց հետո: Այնուհանդերձ, արտիստներին այս հարցը եւս շատ հուզում է:

ՆԱՆԱ ՍԱՐԳՍՅԱՆ

Այս թեմայով Ռուսական դրամատիկական թատրոնը բացեց 89-րդ թատերաշրջանը «Սովորական պատմություն» ներկայացմամբ Դավիթ Իշխանյանի ուղերձը , հենց ցեղասպանության ենթարկվող անձի հայի ոգեղենություն պահելու խնդրանքն էր Խնդրում ենք վարչապետին քայլեր ձեռնարկել քաղաքային բյուջեն հոր «դուքյանի» վերածած համայնքապետից մեզ ազատելու համար. Ահազանգում են վայքեցիները Հայաստանի հավաքականի կիսապաշտպանը մոտ է նոր ակումբ տեղափոխվելուն Մահացել է բալետի արտիստ Սերյոժա Պետրոսյանը