Ամանորի կախարդանքը Երեւանի թատրոններում

Երեւանի թատրոններն այս տարի կրկին կախարդական մթնոլորտ են ստեղծել՝ Ամանորը ջերմությամբ ու հեքիաթներով դիմավորելու համար: Բեմադրիչներն ու դերասաններն, ասես, հեքիաթի հերոսներ, սրտանց աշխատել են, որ յուրաքանչյուր ներկայացում հանդիսատեսին փոխանցի տոնական ուրախության ու հուզմունքի մթնոլորտ:

Այս տարի թատրոններում կրկին ցուցադրվում են սիրված հեքիաթներ: Ամանորի ներկայացումների մեկնարկը տրվել է դեկտեմբերի 18-ից եւ կշարունակվի մինչեւ դեկտեմբերի 30-ը, այնուհետեւ վերսկսելով 2025 թվականի հունվարի 3-ից մինչեւ հունվարի 7-ը: Տոմսերի գները տատանվում են 1500-ից մինչեւ 5000 դրամ:

Կ. Ստանիսլավսկու անվան ռուսական դրամատիկական թատրոնը Ամանորին կներկայացնի, ըստ Հանս Քրիստիան Անդերսենի հեքիաթի, «Մատնաչափիկ» ներկայացումը (բեմադրիչ՝ Նունե Կիրակոսյան): Ծաղկից ծնված փոքրիկ աղջիկը, որի անունը Մատնաչափիկ է, անցնում է բազմաթիվ փորձությունների միջով: Ճանապարհին նա հանդիպում է դոդոշին, բզեզին եւ խլուրդին, որոնցից յուրաքանչյուրը ցանկանում է նրան իր հարսնացուն դարձնել: Չնայած դժվարություններին, Մատնաչափիկը մնում է բարի եւ հավատարիմ իր երազանքներին: Ի վերջո, նա գտնում է իր երջանկությունը՝ տունը, որտեղ իրեն սպասում են։ Ներկայացումից առաջ փոքրիկ հանդիսատեսին հյուր կգան Ձմեռ պապն ու Ձյունանուշը:

Հ. Պարոնյանի անվան երաժշտական կոմեդիայի թատրոնում բեմ կբարձրանա, ըստ Լուիս Քերոլի` «Ալիսան հայելիների աշխարհում» ներկայացումը (բեմադրիչ՝ Կարո Բալյան): «Ալիսան հայելիների աշխարհում» հեքիաթային, երաժշտական ներկայացում է, որտեղ Ալիսան հայտնվում է կախարդական աշխարհում՝ լի ուրախ պարերով, զվարճալի կերպարներով եւ շախմատային արկածներով։ Խոսող կենդանիներն ու կախարդական իրավիճակները բեմը լցնում են ուրախությամբ ու հրաշքով՝ հիացնելով մեծերին ու փոքրերին։

«Փոքր» թատրոնում Ամանորի` «Թեյախմություն Ձմեռ պապի հետ» ներկայացումը ինտերակտիվ է (բեմադրիչ՝ Վահան Բադալյան):

«Թատրոն Կայարան»-ում կցուցադրվի, ըստ Վիգեն Ստեփանյանի` «Թումանյանի անճարները Ամանորին» ներկայացումը (բեմադրիչ՝ Իշխան Ղարիբյան)։

Վ. Մ․

Այս թեմայով Ռուսական դրամատիկական թատրոնը բացեց 89-րդ թատերաշրջանը «Սովորական պատմություն» ներկայացմամբ Այսօր Ալեքսանդր Սամսոնիչը կդառնար 90 տարեկան Ներքին ագրեսիայով չի կարելի հասնել խաղաղության․ կայացավ «Մնա» ներկայացման առաջնախաղը «ՆեԵսենին»-ը գտավ իր տունը․ Բաբկեն Զաքարյան Շահվերդյանը բացահայտել է, թե ինչ է լինում, երբ 50+ տղամարդը փորձում է խաբել․․․ տարիքին